बर्न्टओकका गोर्खाली परिवारहरूको जीवनयात्रामा आधारित वृत्तचित्र सार्वजनिक

लन्डन – बेलायतको बर्न्टओकमा बसोबास गर्दै आएका गोर्खाली परिवारहरूको जीवनयात्रामा आधारित छोटो वृत्तचित्र ‘गोर्खा रुट्स: अ बर्न्ट ओक स्टोरी (Gurkha Roots: A Burnt Oak Story) सार्वजनिक भएको छ।

बार्नेट काउन्सिलले आयोजना गरेको Light + Flight Festival अन्तर्गत artsdepot ले बर्न्ट ओक नेप्लिज कम्युनिटीका सदस्यहरू र फिल्म निर्माता सोनम सुमारियासँगको सहकार्यमा यो वृत्तचित्र तयार पारेको हो।

कथा के हो?

‘गोर्खा रुट्स’ बर्न्ट ओकमा बसोबास गर्दै आएका गोर्खाली परिवारहरूको जीवनयात्रा, संघर्ष, त्याग र पहिचानको कथा हो। जन्मभूमि नेपालबाट सपना, आशा र जिम्मेवारी बोकेर बेलायत आएका गोर्खालीहरूले नयाँ देशमा जीवन कसरी सुरु गरे, कस्ता चुनौतीको सामना गरे र परिवार तथा समुदायको भविष्य बनाउन कति मेहनत गरे भन्ने अनुभव यसमा समेटिएको छ।

विशेषगरी पहिलो पुस्ताका गोर्खाली अग्रजहरूको योगदान, संघर्ष, देशप्रतिको माया र परिवारका लागि गरेको त्यागलाई वृत्तचित्रले सम्मानपूर्वक प्रस्तुत गरेको छ।

तर यो कथा पहिलो पुस्ताको इतिहासमा मात्र सीमित छैन। बर्न्ट ओकमै जन्मिएर यहीँ हुर्किरहेको नयाँ पुस्ताको अनुभव, पहिचान, संस्कृति, भाषा र पुर्खासँगको सम्बन्धलाई पनि यसले उजागर गरेको छ।

दुई पुस्ताबीच सोच र जीवनशैलीमा भिन्नता भए पनि नेपाली संस्कृति, परम्परा र आफ्नो जराप्रतिको माया कसरी एक पुस्ताबाट अर्को पुस्तामा सर्दै आएको छ भन्ने देखाउने प्रयास वृत्तचित्रमा गरिएको छ।

बर्न्ट ओकलाई आफ्नो घर बनाउँदै यहाँको बहुसांस्कृतिक समाजमा योगदान पुर्‍याइरहेका गोर्खाली परिवारहरूको साझा इतिहास र पहिचानको यो एउटा महत्वपूर्ण दस्तावेज हो — विगतको सम्झना, वर्तमानको पहिचान र भावी पुस्ताका लागि छोडिएको गौरवपूर्ण विरासत।

निर्माण र व्यवस्थापन
, वृत्तचित्रको निर्देशन स्वतन्त्र निर्माण कम्पनी Guerrera Films की सोनम सुमारियाले गरेकी हुन्। फिल्मनिर्माता दिदीबहिनी शीना र सोनम सुमारियाले स्थापना गरेको यो कम्पनीले चलचित्रलाई प्रतिरोध र सामाजिक न्यायको माध्यम बनाउँदै समाजको किनारामा रहेका मानिसहरूका कथा अगाडि ल्याउँदै आएको छ।

बर्न्ट ओक नेप्लिज कम्युनिटीको तर्फबाट परियोजनाको सुरुदेखि अन्त्यसम्मको समन्वय र व्यवस्थापन अफिस म्यानेजर ओम कुमारी गुरुङले गरेकी थिइन् ।

यो वृत्तचित्र नेसनल लटरी हेरिटेज फन्डको सहयोगमा उपलब्ध Light + Flight Community Heritage Grant अन्तर्गत निर्माण गरिएको हो।

कहाँ र कहिले हेर्न सकिन्छ?

* नोभेम्बर १४ र १५: Finchley Lakeside (N3 2QT) मा Light + Flight Festival को क्रममा प्रदर्शन — शनिबार दिउँसो १२ देखि राति ९ बजेसम्म र आइतबार बिहान ११ देखि साँझ ७ बजेसम्म। प्रवेश निःशुल्क।

* नोभेम्बर २१ र २२: फेरि प्रदर्शनीमा रहनेछ।

* नोभेम्बर २१ देखि महिनाको अन्त्यसम्म: artsdepot को क्याफे फोयरमा हेर्न सकिनेछ। artsdepot को LIT/UP सप्ताहान्तमा यसको औपचारिक सुरुवात हुनेछ।

समुदायका सदस्यहरूलाई आफ्नो परिवारसहित आएर यो कथा हेर्न र बर्न्ट ओकमा नेपाली समुदायको यात्राको साक्षी बन्न समाजले आग्रह गरेको छ।