‘छालबाटो’ लाई २०८१ को पद्मश्री साहित्य पुरस्कार, शर्मा र सुवेदी सम्मानित

लन्डन । खेमलाल हरिकला लामिछाने प्रतिष्ठानले वि.सं. २०८१ को ‘पद्मश्री साहित्य पुरस्कार’ साहित्यकार रमेश भुसालको संस्मरणात्मक कृति ‘छालबाटो’ लाई प्रदान गर्ने निर्णय गरेको छ । प्रतिष्ठानका अध्यक्ष जीवा लामिछानेले आइतबार एक विज्ञप्ति जारी गर्दै सो जानकारी दिएका हुन् ।

यो वर्ष प्रकाशित २०३ कृतिमध्ये छनोट समितिको सिफारिसमा भुसालको ‘छालबाटो’ छानिएको हो । यस कृतिमा लेखकले कैलाश मानसरोवर हुँदै तिब्बतस्थित कर्णालीको उद्गम र भारतको गङ्गासम्मको यात्रामा कर्णाली नदीको प्रवाह, सीमा सुरक्षा, जलवायु परिवर्तन, जलविद्युत्, विस्थापन, वन्यजन्तु तथा स्थानीय जीवनका संवेदनशील प्रसङ्गलाई जीवन्त रूपमा प्रस्तुत गरेका छन्।

यसैगरी, ‘पद्मश्री साधना सम्मान’ यस वर्ष नेपाली शिक्षा परिषद्की अध्यक्ष रमा शर्मालाई अर्पण गर्ने निर्णय गरिएको छ । जीवनभर भाषा, साहित्य, संस्कृति र कलाको उन्नयनमा सक्रिय रहँदै उनले अनुसन्धान, समालोचना, जीवनी, निबन्ध, बालसाहित्य लगायतका करिब दुई दर्जन पुस्तक प्रकाशित गरेकी छन्।

त्यसैगरी, ‘पद्मश्री गौरव पुरस्कार’ यस वर्ष प्रा. डा. अभिनारायण (अभि) सुवेदीलाई प्रदान गरिने भएको छ। नेपाली र अङ्ग्रेजी दुवै भाषामा कलम चलाउने सुवेदी निबन्धकार, समालोचक, भाषाविद्, नाटककार, अनुवादक तथा कवि हुन्। उनका करिब तीन दर्जन कृति प्रकाशित भएका छन्।

यी तीनवटै पुरस्कार तथा सम्मानमा जनही तीन लाख रुपैयाँ नगद र सम्मानपत्र रहनेछ । पुरस्कार तथा सम्मान कोजाग्रत पूर्णिमाको दिन प्रदान गरिनेछ ।

प्रतिष्ठानले वि.सं. २०६३ सालदेखि नेपाली साहित्यका उत्कृष्ट कृतिलाई पद्मश्री साहित्य पुरस्कार प्रदान गर्दै आएको छ ।