बेलायतमा ‘गौथली’को प्रदर्शन उत्साहजनक, अब १३ अगष्टसम्म मात्रै सिनेमा घरहरूमा

लन्डन – नेपाली सामाजिक कथानक चलचित्र ‘गौथली’ ले ७ अगस्ट शुक्रबार बेलायतमा प्रदर्शन भएलगत्तै धेरैजसो सिनेमा घरहरूमा हाउसफुल र लगभग पूर्ण सिटका साथ असाधारण सुरुवात गरेको छ।

दर्शकहरूको अभूतपूर्व प्रतिक्रियाका कारण सिनेवर्ल्ड सिनेमा घरहरूमा थप शोहरू थपिएका छन्।

बेलायतमा चलचित्रको प्रदर्शन अवधि अब बिहीबार, १३ अगस्टसम्मका लागि बढाइएको छ जसले दर्शकहरूलाई चलचित्र हेर्ने थप अवसर प्रदान गरेको छ।

‘गौथली’ को प्रदर्शन बिहीबार, १३ अगस्टसम्म निम्न सिनेमा घरहरूमा जारी रहनेछ:

सिनेवर्ल्ड (Cineworld): अल्डरशट, बेक्सलेहिथ, फेल्थम, बर्मिंघम एनइसी, इलफोर्ड, साउथ राइसलिप, स्विन्डन

भ्यू (Vue): ह्यारो, रेडिङ, लिड्स लाइट, वाटफोर्ड र बर्मिंघम स्टार सिटी, वेस्टफिल्ड स्ट्र्याटफोर्ड, बेजिङस्टोक फेस्टिभल प्लेस, डेगनहाम, फार्नबोरो, नर्थ्याम्पटन, रोमफोर्ड, थरोक र योर्क

सेभोय (Savoy): डोनकास्टर, क्याटरिक र ग्रान्थम

अन्य स्थानहरू: मेट्रो सिनेमा ह्यारो, पिकाडिली सिनेमा लेस्टर र द आर्क सिनेमा प्रेस्टन।

धेरैजसो शोहरू हाउसफुल भइरहेकाले दर्शकहरूलाई आफ्नो स्थानीय सिनेमा घरमा शोको समय हेरेर चाँडै टिकट बुक गर्न अनुरोध गरिएको छ ।

शिक्षा र सहनशीलताको एक शक्तिशाली कथा

डा. कपिल रिजालको निर्देशन र डा. भोला रिजालको कथा लेखनमा बनेको ‘गौथली’ ग्रामीण नेपालको पृष्ठभूमिमा आधारित एक शक्तिशाली नेपाली सामाजिक चलचित्र हो।

यो चलचित्र गरिबी, बालविवाह र गहिरो रूपमा गाडिएका सामाजिक मान्यताहरूका बावजुद आफ्नो शिक्षालाई निरन्तरता दिन दृढ संकल्पित एक युवतीको कथामा आधारित छ।

आफ्नो भावुक कथावस्तु, संगीत र उत्कृष्ट छायांकनमार्फत चलचित्रले शिक्षा, महिला सशक्तिकरण, बालविवाह, लैंगिक असमानता र सामाजिक रूपान्तरणका विषयहरूलाई खोतलेको छ। साथै, यसले राम्रो र बढी आत्मनिर्भर जीवनका लागि संघर्ष गर्ने महिलाहरूको सहनशीलतालाई उजागर गर्दछ।

सुमन गिरी र डा. कपिल रिजालद्वारा निर्मित यस चलचित्रमा अरुण क्षेत्री र सिम्रन खड्का साथै मदनकृष्ण श्रेष्ठ, प्रकाश घिमिरे, लुनिभा तुलाधर र रवीन्द्र झा जस्ता वरिष्ठ तथा चर्चित कलाकारहरूको अभिनय छ।

‘गौथली’ नेपालमा १७ जुलाई २०२६ मा प्रदर्शन भएको थियो र त्यसपछि यसले आफ्नो सफल व्यावसायिक यात्रा जारी राखेको छ।

अल्डरशटको उद्घाटन शोमा विशिष्ट अतिथिहरूको उपस्थिति

७ अगस्टका दिन सिनेवर्ल्ड अल्डरशटमा आयोजित पहिलो दिनको प्रदर्शनमा बेलायतका लागि कार्यवाहक नेपाली राजदूत विपिन दुवाडी, सैनिक सहचारी बिग्रेडियर जनरल अनुप शाह लगायतका विशिष्ट व्यक्तित्वहरुको उपस्थिति थियो।

चलचित्र हेरिसकेपछि पाहुनाहरूले यसको छायांकन, कथावस्तु र यसका महत्त्वपूर्ण सामाजिक विषयहरू, विशेष गरी शिक्षा, महिला सशक्तिकरण र हानिकारक सामाजिक परम्पराहरूले सिर्जना गरेका चुनौतीहरूमाथि गरिएको केन्द्रित प्रयासको प्रशंसा गरे।

कार्यवाहक राजदूत दुवाडीले यो चलचित्रले सामाजिक विषय र रूपान्तरणलाई हृदयस्पर्शी भावका साथ उजागर गरेको टिप्पणी गरे। ब्रिगेडियर जनरल अनुप शाहले चलचित्र “राम्रोसँग निर्देशित, उत्कृष्ट बहाव र मर्मस्पर्शी अभिनययुक्त” भएको बताए।

समीक्षकहरूको प्रतिक्रिया

चलचित्र समीक्षक जुलिया कर्किन्डेलले अन्नपूर्णको काखमा गरिएको सुन्दर छायांकन र परम्परा तथा आकांक्षाबीच अल्झिएको समाजको शक्तिशाली प्रस्तुतिको प्रशंसा गर्दै ‘गौथली’ लाई एक “आकर्षक र शिक्षाप्रद” चलचित्रका रूपमा वर्णन गरिन्।

कन्सल्टेन्ट डेभलपमेन्टल पेडियाट्रिसियन डा. यमुना आचार्यले थपिन्, “एक अटिजम विशेषज्ञ र महिलाको रूपमा, मलाई कुनै शंका छैन कि यो चलचित्रले अभिभावक, जीवनसाथी, दाजुभाइ-दीदीबहिनी र व्यापक समाजले भोग्नुपरेका चुनौती र कठिनाइहरूका बारेमा मूल्यवान अन्तर्दृष्टि प्रदान गर्नेछ। साथै यी चुनौतीहरूलाई कसरी करुणा र सहनशीलताका साथ बुझ्न र सम्बोधन गर्न सकिन्छ भन्ने कुरालाई पनि उजागर गर्नेछ।”

बेलायती दर्शकहरूलाई हार्दिक धन्यवाद

नेपाली समुदाय र व्यापक बेलायती दर्शकहरूबाट प्राप्त असाधारण प्रतिक्रिया नेपाली सिनेमा र मौलिक कथाहूप्रतिको बढ्दो रुचिको प्रमाण हो।

गौथली टिम चलचित्र हेर्न आउनुहुने, चलचित्रका बारेमा जानकारी सेयर गर्नुहुने, साथीभाइ तथा परिवारलाई हेर्न प्रोत्साहित गर्नुहुने र जुनसुकै माध्यमबाट चलचित्रलाई सहयोग गर्नुहुने सबैप्रति निर्देशक डा कपिल रिजालले हार्दिक धन्यवाद ज्ञापन गरेका छन् ।

प्रत्येक हाउसफुल शो र समर्थनका प्रत्येक अभूतपूर्व सन्देशहरूले बेलायतको सुरुवातलाई यति ठूलो सफलता दिलाउन मद्दत गरेका छन्।

बेलायतमा ‘गौथली’को सफलता एउटा चलचित्रको प्रदर्शन मात्र नभई नेपाली कथावाचन, संस्कृति, संगीत र सिनेमाको उत्सवको रुपमा हेरिएको छ, जसले बेलायत र बाहिरका दर्शकहरूमाझ एक शक्तिशाली कथा र महत्त्वपूर्ण सामाजिक सन्देश पुर्‍याएको छ।