राष्ट्रपति पौडेलले गरे नवकन्याहरुको पूजा

पूजापछि राष्ट्रपति रामचन्द्र पौडेल नवकन्याहरूसँग । तस्बिर- राष्ट्रपतिको सचिवालय

काठमाडौं । राष्ट्रपति रामचन्द्र पौडेलले बडा दसैँको नवौँ दिन बुधबार नवकन्याहरुको पूजा गरेका छन्। राष्ट्रपति भवन शितल निवासमा राष्ट्रपति पौडेलले महानवमीको शुभ दिनमा नवकन्याहरुको पूजा गरेका हुन्।

राष्ट्रपति पौडेलले नवकन्याको गोडा धोएर टीका लगाई उपहार प्रदान गरेका थिए।

राष्ट्रपतिको सचिवालयका अनुसार उनले बालमन्दिर नक्सालमा रहेका नवकन्याहरुको पूजा गरेका हुन्।

दसैँ पर्वका अवसरमा महानवमीको दिनमा राष्ट्रप्रमुखले नवकन्याको पूजा प्रत्येक वर्ष गर्ने प्रचलन छ।

दुर्गा भगवतीको शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्री महागौरी र सिद्धिदात्रीका रुपमा नौ रूपको पूजा गर्ने गरिन्छ।