बाढी प्रभावित समुदायलाई सक्दो सहयोग गर्न पिटरबरो नेपाली समाज यूकेको अपिल

लन्डन — नेपालमा गत अगष्ट २६ तारिखमा हिमपहिरो र चट्टान खसेपछि लेन्दे खोला, भोटेकोशी र त्रिशूली नदी प्रणालीमा आएको भीषण बाढीबाट प्रभावित समुदायलाई सक्दो सहयोग गर्न पिटरबरो नेपाली समाज यूकेले अपिल गरेको छ।

सो विपद्का कारण सडक, पुल र जलविद्युत् आयोजनालगायतका भौतिक पूर्वाधारमा ठूलो क्षति पुग्नुका साथै सुरुङभित्र कैयौँ श्रमिकहरू थुनिएका थिए।

पछिल्लो विवरण अनुसार बाढीका कारण विदेशी नागरिक सहित १,३०० भन्दा बढी मानिसले ज्यान गुमाइसकेका छन् भने करिब ५,००० जना अझै बेपत्ता छन्।

यस दुखद खबरले बेलायतमा बसोबास गर्ने नेपाली समुदायलाई स्तब्ध बनाएको छ। पिटरबरो नेपाली समाज यूकेका अध्यक्ष विष्णुबहादुर थापाले स्थानीय धेरै परिवारका आफन्तहरू बेपत्ता भएकाले समुदायमा गहिरो शोक छाएको बताए।

“मेरी श्रीमतीका एक जना २७ वर्षीय नातेदार हिमाली क्षेत्रमा गएका थिए, उनी अझै बेपत्ता छन्,” थापाले भने, “यहाँका धेरै परिवारले नेपालमा रहेका आफ्ना घर, जग्गा र जायजेथा सबै गुमाउनुपरेको बताएका छन्।”

समाजमा पिटरबरो, हन्टिंगडन र लिङ्कनशायर क्षेत्रका करिब ३०० परिवार आबद्ध छन्। समाजले स्थानीय व्यवसायी र अन्य सामाजिक संघसंस्थाहरूसँग सहकार्य गरी सहयोग संकलन अभियान चलाएको हो।

काठमाडौँ लाउन्ज लगायतका रेस्टुरेन्टहरु संचालन गर्दै आएका व्यवसायी कृष्ण क्रिसले पनि आफ्नो रेस्टुरेन्टमार्फत सहयोग आह्वान गरेको जनाए। उनले नेपालको पीडामा सघाउने स्थानीय ब्रिटिश समुदाय लगायत सबैलाई हार्दिक धन्यवाद दिए ।

पिटरबरो नेपाली समाजले तलको एकाउन्टमा रकम पठाएर सक्दो सहयोग गर्न बेलायतस्थित नेपाली समुदाय तथा नेपालका मित्रहरुलाई हार्दिक अपिल गरेको छ।

संकलित रकम पारदर्शी तरिकाले लन्डनस्थित नेपाली दूतावाससँग समन्वय गरी नेपालको प्रधानमन्त्री दैवी प्रकोप उद्धार कोषमा पठाइने अध्यक्ष थापाले जनाएका छन् ।