जगुआर ल्यान्ड रोभरले दुई वर्षमा ४ हजार कर्मचारी कटौती गर्ने घोषणा

लन्डन । बेलायतको सबैभन्दा ठूलो कार निर्माता कम्पनी जगुआर ल्यान्ड रोभरले आगामी दुई वर्षभित्र विश्वभरबाट करिब ४ हजार रोजगारी कटौती गर्ने घोषणा गरेको छ।

कठिन व्यापारिक अवस्था, अमेरिकी ट्यारिफको प्रभाव र गत वर्षको साइबर आक्रमणबाट परेको असरबीच कम्पनीले ठूलो संख्यामा कर्मचारी घटाउने योजना सार्वजनिक गरेको हो।

भारतीय औद्योगिक समूह टाटाको स्वामित्वमा रहेको जेएलआरले करिब १ अर्ब ७० करोड पाउन्ड खर्च बचत गर्ने योजनाअन्तर्गत रोजगारी कटौती गर्न लागेको जनाएको छ। कम्पनीमा विश्वभर करिब ४४ हजार कर्मचारी कार्यरत छन् जसमध्ये ३४ हजार बेलायतमा छन्।

प्रस्तावित कटौतीको मुख्य असर बेलायतमा कार्यरत करिब २६ हजार तलबमा आधारित  तथा व्यवस्थापकीय कर्मचारीमा पर्ने बताइएको छ। विशेषगरी व्यवस्थापन मार्केटिङ तथा अनुसन्धान र विकास विभागका कर्मचारी प्रभावित हुने अपेक्षा गरिएको छ।

घण्टाका आधारमा पारिश्रमिक पाउने अधिकांश कारखाना तथा उत्पादन क्षेत्रका कामदार भने कटौतीबाट प्रभावित नहुने बुझिएको छ। जेएलआरका सोलिहल वारविकसायर र मर्सीसाइडमा उत्पादन केन्द्र छन् भने कम्पनीको मुख्यालय कभेन्ट्रीमा रहेको छ।

जेएलआरका प्रमुख कार्यकारी पीबी बालाजीले विश्व अटोमोबाइल उद्योग तीव्र प्रतिस्पर्धा प्रविधिमा भइरहेको परिवर्तन र निरन्तर भूराजनीतिक अनिश्चितताबाट गुज्रिरहेको बताएका छन्। कम्पनीलाई दीर्घकालीन रूपमा थप प्रतिस्पर्धी र सबल बनाउन अघि सारिएको रणनीतिक रूपान्तरणअन्तर्गत आगामी दुई वर्षमा करिब ४ हजार पद घटाइने उनले बताए।

उनले रोजगारी कटौतीको निर्णय प्रभावित कर्मचारीका लागि कठिन समाचार भएको स्वीकार गर्दै उनीहरूलाई निष्पक्षता सम्मान र आवश्यक सहयोगका साथ व्यवहार गरिने प्रतिबद्धता व्यक्त गरेका छन्।

जेएलआर पछिल्लो समय विश्व कार बजारमा बढ्दो प्रतिस्पर्धा र अमेरिकाले लगाएका ट्यारिफका कारण दबाबमा परेको छ। त्यसमाथि गत वर्ष भएको साइबर आक्रमणपछि कम्पनीका कारखानाहरू बन्द गर्नुपरेको घटनाले पनि व्यवसायमा गम्भीर असर पारेको थियो। यी चुनौतीका कारण कम्पनीको नाफामा उल्लेख्य गिरावट आएको छ।

बेलायतका व्यापारमन्त्री जोनाथन रेनोल्ड्सले रोजगारी कटौती रोक्न करदाताको पैसा प्रयोग गरी कम्पनीलाई आर्थिक सहायता दिने सम्भावना अस्वीकार गरेका छन्। उनले मंगलबार जेएलआरका प्रमुख कार्यकारी बालाजी र युनाइट ट्रेड युनियनकी महासचिव शेरोन ग्राहमसँग छलफल गर्ने कार्यक्रम छ।

ग्राहमले अनिवार्य रूपमा कर्मचारी हटाउनुभन्दा पुनःतालिम र कम्पनीभित्रै अन्य जिम्मेवारीमा स्थानान्तरणलाई प्राथमिकता दिन दबाब दिने अपेक्षा गरिएको छ।

संसद्को बिजनेस एन्ड ट्रेड कमिटीका अध्यक्ष लियाम बर्नले जेएलआरको निर्णयलाई वेस्ट मिडल्यान्ड्सका कामदार उनीहरूका परिवार र स्थानीय समुदायका लागि ठूलो धक्का भनेका छन्। उनले प्रभावित कर्मचारीलाई नयाँ रोजगारी खोज्न अधिकतम सहयोग उपलब्ध गराउन सरकारसँग आग्रह गरेका छन्।

जेएलआरको यो घोषणा प्रधानमन्त्री एन्डी बर्नहमले बेलायतलाई पुनः औद्योगिकीकरण गर्ने प्रतिबद्धता व्यक्त गरिरहेका बेला आएको छ। कम्पनीको निर्णयले सरकारको औद्योगिक पुनरुत्थान योजनामाथि समेत प्रारम्भिक चुनौती थपेको छ।