शुक्रबार, फागुन २१, २०७७
13:13 | १८:५८

भारतमा फुटपाथमा सुतिरहेका मजदूरमाथि ट्रक गुड्दा १५ को मृत्यु  

प्रधानमन्त्रीद्धारा राहत घोषणा 

रासस-एएनआई जनवरी १९, २०२१

नयाँदिल्ली, ६ माघ– भारतको गुजरात राज्य अन्तर्गत पर्ने सुरतको कासाम्बा क्षेत्रमा फुटपाथमा सुतिरहेका मजदूरमाथि ट्रक गुड्दा भएको दुर्घटनामा परी कम्तीमा १५ जनाको मृत्यु भएको छ ।

दुर्घटनामा मृत्यु भएकाको परिवारलाई २ लाख भारतीय रुपैयाँको दरले राहत दिने प्रधानमन्त्री नरेन्द्र मोदीले घोषणा समेत गरेका छन् ।

मृतकप्रति श्रद्धान्जलि व्यक्त गर्दै मोदीले शोक सन्तप्त परिवारजनप्रति सहानुभूति समेत व्यक्त गरेका छन् । मृतकका आफन्तलाई प्रधानमन्त्री राष्ट्रिय सहायता कोषबाट सो रकम दिइने भएको अधिकारीहरुले जानकारी दिएका छन् ।

“सुरतमा भएको दुर्घटनामा परी मानवीय क्षति भएकोमा मलाई अत्यन्त दुःख लागेको छ, यो घटना ज्यादै पीडादायी छ, शोकाकुल परिवारजनप्रति सहानुभूति व्यक्त गर्दै घाइतेहरुको शिघ्र स्वास्थ्य लाभको कामना गर्दछु,” प्रधानमन्त्री मोदीले ट्वीटरमा लेखेका छन् ।

उनले घाइते भएकाहरुलाई पनि ५० हजार भारतीय रुपैयाँका दरले राहत रकम उपलब्ध गराइने अर्को ट्वीट मार्फत् जानकारी दिएका छन् ।

सुरतको कोसम्बामा सोमबार राति एउटा ट्रकले ठक्कर दिँदा मृत्यु भएका १५ जना मध्ये सात जना महिला, सात पुरुष र एक जना एक वर्षीय शिशु रहेको अधिकारीहरुले जनाएका छन् ।

घाइते भएका ६ जनाको अस्पतालमा उपचार भइरहेको स्थानीय प्रहरीको भनाई छ ।

प्रतिक्रियाहरू

सम्बन्धित सामग्रीहरू