एमाले संसदीय दलको नेतामा थापा निर्विरोध निर्वाचित

काठमाडौँ। नेकपा (एमाले) को संसदीय दलको नेतामा रामबहादुर थापा निर्विरोध निर्वाचित हुनुभएको छ। ललितपुरको च्यासलस्थित पार्टी केन्द्रीय कार्यालयमा बुधबार आयोजित संसदीय दलको नेता चयन प्रक्रियामा थापाको मात्र उम्मेदवारी परेपछि उहाँ निर्विरोध निर्वाचित हुनुभएको हो।

नेपाल कम्युनिष्ट पार्टी (एमाले) संघीय संसदीय दलको विधान २०७७ को दफा ६ बमोजिम निर्वाचन कार्यक्रम तय गरिएको थियो। प्रतिनिधि सभा सदस्यसमेत रहनुभएका थापाको एकल उम्मेदवारी परेपछि मतदान अधिकृत निरज आचार्यले उहाँ निर्विरोध निर्वाचित भएको घोषणा गर्नुभएको हो।

निर्वाचन समितिका सदस्यहरू डा. भीष्म अधिकारी र राजेन्द्र श्रेष्ठको रोहबरमा २०८२ चैत १८ गते दिउँसो ४:१५ बजे सो घोषणा गरिएको पत्रमा उल्लेख छ। एमालेको पछिल्लो आन्तरिक शक्ति सन्तुलन र संसदीय भूमिकाका दृष्टिले थापाको यो चयनलाई निकै महत्त्वका साथ हेरिएको छ।