अस्ट्रेलियामा अध्ययनरत लुना बनिन् ‘मिस नेपाल २०२५’

काठमाडौँ– अष्ट्रेलियामा अध्ययनरत २६ वर्षीया लुना लुइँटेल मिस नेपाल २०२५ बन्न सफल भएकी छन् ।

आयोजक संस्था द हिडन ट्रेजरले शनिबार आयोजना गरेको मिस नेपालको ३१ औं संस्करणमा २५ प्रतियोगीलाई पछाडि पार्दै लुनाले मिस नेपाल वर्ल्डको ताज पहिरेकी हुन् ।

‘मिस नेपाल वर्ल्ड २०२४’ आश्मा कुमारी केसीले लुनालाई ताज पहिर्‍याइन्।

लुना १७ वर्षको उमेरमै अष्ट्रेलिया गएकी थिइन् । उनले त्यहाँ नर्सिङ अध्ययन गरिन् । ‘युनिभर्सिटी अफ सिड्नी’बाट पब्लिक हेल्थमा स्नातकोत्तर अध्ययनरत लुना यसअघि सन् २०१५ मा मिस टिनको पहिलो उपविजेता बनेकी थिइन् ।

गोदावरी सनराइज कन्भेन्सन सेन्टरमा आयोजित प्रतियोगितामा उरुषा भण्डारीले ‘मिस नेपाल इन्टरनेसनल’ को ताज जितिन् । उरुषाले ‘मिस टाइमलेस एलिगेन्स’ र ‘रियल मिस पपुलर च्वाइस’ गरेर अरु दुई उपाधि पनि जितिन् ।

त्यस्तै, सोनी घले ‘मिस नेपाल अर्थ २०२५’ घोषित भइन् भने दीपशिखा नेपाल ‘मिस नेपाल कस्मो’ बनिन् ।

‘मिस कन्फिडेन्ट’को उपाधि प्रज्ञिका क्षेत्रीले जितिन् भने सइच्छा थापाले ‘मिस ब्यूटिफूल हेयर’ र आरती थापाले ‘मिस हेल्दी स्किन’को उपाधि जिते ।

त्यसैगरि, ‘मिस ग्रीन भिजनरी’को उपाधि जगदिश्वरी शाहले प्राप्त गर्दा ‘मिस प्रिस्टिन’ उपाधि प्रियंका थापाले पाइन् । लुना लुइँटेलले ‘मिस डिलाइटफुल ह्याप्पीनेस इन्टिलिजेन्ट’ उपाधि र दीपशिखा नेपालले ‘मिस इम्पावर्ड च्वाइस’ उपाधि जिते ।

स्मृति श्रेष्ठले ‘मिस फेस अफ फार्मेसी’ र ‘मिस फोटोजेनिक’ गरि दुई उपाधि जितिन् ।