सांसद खगेन्द्र सुनारमाथि रास्वपाले थाल्यो छानबिन, औपचारिक कार्यक्रममा सहभागी नहुन निर्देशन

काठमाडौं। राष्ट्रिय स्वतन्त्र पार्टी (रास्वपा) ले आफ्ना प्रतिनिधिसभा सदस्य खगेन्द्र सुनारमाथि सार्वजनिक भएका गम्भीर आरोपबारे आन्तरिक छानबिन सुरु गर्ने निर्णय गरेको छ। पार्टीले छानबिनको निष्कर्ष नआएसम्म सुनारलाई सार्वजनिक पदको हैसियतमा कुनै पनि औपचारिक कार्यक्रममा सहभागी नहुन निर्देशन दिएको छ।

रास्वपाका महामन्त्री विपिन कुमार आचार्यद्वारा जारी विज्ञप्तिमा सुनारका सम्बन्धमा सञ्चारमाध्यममा प्रकाशित समाचार, सार्वजनिक भएका श्रव्य सामग्री तथा उठेका गम्भीर प्रश्नहरूप्रति पार्टीको ध्यानाकर्षण भएको जनाइएको छ।

सञ्चारमाध्यममार्फत महिलाको मर्यादा र सम्मानमा आँच पुर्‍याउने कार्य, अनुचित दबाब, अवाञ्छित धम्की तथा शंकास्पद आर्थिक लेनदेनजस्ता आरोप सार्वजनिक भएको उल्लेख गर्दै पार्टीले ती विषय अत्यन्त गम्भीर र संवेदनशील रहेको जनाएको छ।

पार्टीले आरोपहरूको सत्यतथ्य पत्ता लगाउन केन्द्रीय अनुशासन आयोगलाई तत्काल आन्तरिक छानबिन अगाडि बढाउन निर्देशन दिइसकेको स्पष्ट पारेको छ।

अनुसन्धान प्रक्रिया प्रभावित नहोस् र पदीय नैतिकता कायम रहोस् भन्ने उद्देश्यले छानबिनको निष्कर्ष नआएसम्म सुनारलाई सार्वजनिक पदको हैसियतमा औपचारिक कार्यक्रममा सहभागी नहुन निर्देशन दिइएको विज्ञप्तिमा उल्लेख छ।

रास्वपाले महिलामाथि हुने कुनै पनि प्रकारका दुर्व्यवहार, पदीय मर्यादाको उल्लंघन तथा फौजदारी कसुरका विषयमा पार्टीको शून्य सहनशीलताको नीति रहेको दोहोर्‍याएको छ।

त्यस्तै, सार्वजनिक भएका आरोपहरूको गम्भीरतालाई ध्यानमा राख्दै राज्यका सम्बन्धित निकायबाट तत्काल स्वतन्त्र, निष्पक्ष र तथ्यपरक अनुसन्धान हुनुपर्नेमा पार्टीले जोड दिएको छ। राज्यका निकायले गर्ने अनुसन्धानमा पूर्ण सहयोग गर्ने प्रतिबद्धतासमेत जनाएको छ।

‘कानुनभन्दा माथि कोही पनि हुँदैन’ भन्ने लोकतान्त्रिक मान्यतामा आफू दृढ रहेको उल्लेख गर्दै रास्वपाले राज्यको अनुसन्धान र पार्टीको आन्तरिक छानबिनबाट प्राप्त निष्कर्षका आधारमा कानुन तथा पार्टी विधानबमोजिम थप कदम चालिने स्पष्ट पारेको छ।

कानुन उल्लंघन गर्ने वा पदीय आचरणविपरीत कार्य गर्ने जोकोहीलाई राजनीतिक संरक्षण नदिने प्रतिबद्धतासमेत पार्टीले व्यक्त गरेको छ।

यद्यपि, सुनारमाथि सार्वजनिक भएका आरोपहरूको स्वतन्त्र अनुसन्धानबाट पुष्टि हुन बाँकी छ। पार्टीले हालका लागि आन्तरिक छानबिन अघि बढाउने र अनुसन्धान अवधिभर औपचारिक कार्यक्रममा सहभागी हुन रोक लगाउने कदम चालेको हो।