एबर्डीनमा ‘काव्ययात्रा’ र सम्मान

स्कटल्यान्ड ७ सेप्टेम्बर, २०२६- समकालीन साहित्य प्रतिष्ठान बेलायत र ‘एबर्डीन पोएट्री ग्रुप’ को संयुक्त आयोजनामा ५ सेप्टेम्बर साँझ संयुक्त अधिराज्यको स्कटल्यान्डस्थित एबर्डीन सहरमा काव्ययात्रा सम्पन्न भएको छ ।

लन्डन र एबर्डीनका कविहरुको सहभागिता रहेको उक्त कार्यक्रममा कवि डा. मुकुल दाहाल, डा. कृष्ण उपाध्याय, नवीन खड्का, योगराज ढकाल, दुष्यन्त भट्टराई, दुर्गा धिमिरे, मधु सुवेदी, राज क्षेत्री, मीन भट्ट, गंगा चेम्जोङ, कमला घिमिरे र कृष्ण बजगाईंले कविता वाचन गरेका थिए भने टक थापा र कामु ढकालले गीत प्रस्ततु गरे ।

उक्त कार्यक्रममा डा. मुकुल दाहाल, डा. कृष्ण उपाध्याय, नवीन क्षेत्री र दुष्यन्त भट्टराईलाई नेपाली भाषा–साहित्यको संवर्धन एवम् श्रीबृद्धिमा निरन्तर समर्पित रही डायस्पोराको क्षितिजबाट अविश्रान्त साधनाद्वारा विश्वसामु नेपाली वाङ्मयको गरिमा र उच्चता कायम राख्दै उनी हरुले पुरयाएको विशिष्ट योगदानका लागि ‘समकालीन काव्ययात्रा सम्मान’ प्रदान गरिएको थियो ।

समकालीन साहित्य प्रतिष्ठान बेलायतका अध्यक्ष कृष्ण बजगाईंले संस्थाको गतिविधिबारे संक्षिप्त जानकारी दिँदै काव्ययात्राको चौंथो सृङ्खला एबर्डीन सहरमा आयोजना गर्न पाउँदा खुसी व्यक्त गरे ।

उनले काव्ययात्रा र प्रतिभा सम्मान कार्यक्रमलाई प्रतिष्ठानले निरन्तरता दिने बताए । काव्ययात्रा कार्यक्रम बेलायत, अमेरिका, बेल्जियम, नर्वे, डेनमार्कमा पनि आयोजना गरिने उनको भनाइ थियो । बजगाईंले काव्ययात्रामा वाचित कविहरुका कविता सङ्ग्रह प्रकाशन गरिने जानकारी दिए ।

उक्त कार्यक्रममा डा. मुकुल दाहालले सन् २०१५ देखि ‘एबर्डीन पोएट्री ग्रुप’ले नियमितरुपमा कविता गोष्ठी र पुस्तकमाथिको छलफल कार्यक्रम आयोजना गरिरहेको बताए । उनले समकालीन साहित्य प्रतिष्ठान बेलायतको कार्यक्रमको सराहना गरेका थिए ।

कार्यक्रममा डा. कृष्ण उपाध्यायले कविता लेखन र त्यसले पार्ने प्रभावका बारेमा संक्षिप्तरुपमा चर्चा गरे । उक्त कार्यक्रममा एबर्डीन सहरका कवि तथा नेपालीहरुको उल्लेखनीय उपस्थिति थियो ।