एनआरएनए अभियन्ता गौरीराज जोशी लण्डनमा

लण्डन- गैरआवासीय नेपाली संघ (एनआरएनए) अन्तरराष्ट्रिय समन्वय परिषदको दुई कार्यकालका महासचिव गौरीराज जोशी लण्डन आइपुगेका छन्।

९ दिने पारिवारिक भ्रमणमा शुक्रबार बिहान लण्डन आएका जोशीलाई हिथ्रो टर्मिनल थ्रीमा युवा अभियन्ता बीरेन खड्का, नेपाल पत्रकार महासंघ यूके महासचिव नरेन्द्र बस्नेत, एनआरएनए यूके उपाध्यक्ष अनिल मल्ल लगायतले स्वागत गरे ।  

जोशीले बेलायतमा रहंदा केही अनौपचारिक भेटघाट गर्ने कार्यक्रम छ । उनी लिभरपुल, स्कटल्यान्डसम्म पुग्ने खड्काले बताए । 

अमेरिकामा आइटी क्षेत्रमा सफल व्यवसायी जोशी बौद्धिक तथा युवामाझ लोकप्रिय मानिन्छन्। उनी सन् २००५ देखि गैरआवासीय नेपालीको अभियानमा जोडिएका छन् ।  

एनआरएनएलाई प्रविधिमैत्री बनाउन एमआइएस सिस्टम र फेस भेरिफिकेसन सिस्टमका योजनाकार हुन् जोशी। 

चितवनमा जन्मिएका जोशी सन् १९९७ मा अध्ययनका लागि अमेरिका गएका थिए। उनले अमेरिकामै आइटी अध्ययन पूरा गरेर पछि व्यवसाय शुरु गरेका थिए । पछिल्लो समय उनी रियल स्टेटको कारोबारमा पनि संलग्न छन्।

उनको नेपालमा इन्सुरेन्स, बैंकिङ क्षेत्र, प्रविधि, हाइड्रोलगायत विभिन्न क्षेत्रमा समेत लगानी छ। जोशीले भारतमा पनि आइटी व्यवसाय विस्तार गरेका छन्।