नेपालका अनाथको सहयोगार्थ बेलायतमा साइकल यात्रा गरिंदै

लन्डन ।  नेपालका अनाथ बालबालिकाको  सहयोगार्थ बेलायतमा एक च्यारिटी साइकल यात्रा गरिने भएको छ ।  

एनआरएनए इङ्ल्यान्ड राज्य समन्वय परिषदको आयोजनामा आउंदो नोभेम्बर ७ तारिख शनिबार लन्डनको वूल्विचदेखि ब्राइटनसम्मको साइकल यात्रा तय  भएको छ ।  

यो च्यारिटी इभेन्टमा  हेल्प नेपाल नेटवर्क यूके, एनआरएनए यूके खेलकुद विभाग , नेप्लिज हेल्थ एशोसिएसन यूके लगायतको सहकार्य छ ।  च्यारिटी साइकल यात्रामा  संयोजन र सहभागिता वूल्विच आर्सनल राइडर्स क्लबमा आबद्ध सदस्यहरुको रहनेछ ।  

च्यारिटी साइकल यात्राबाट संकलन हुने रकम हेल्प नेपाल नेटवर्कद्वारा काभ्रेको धुलिखेलमा निर्मित बालगृहका अनाथ बालबालिकालाई सहयोग गरिने एनआरएनए इङ्ल्यान्ड राज्य परिषद अध्यक्ष दिपक श्रेष्ठले बताए  ।  

अनाथ बालबालिकाको  सहयोगका  लागि हुन लागेको इभेन्ट भएकाले बेलायतवासी नेपाली एवम्  संघसंस्थाबाट सक्दो सहयोग अपेक्षा गरिएको श्रेष्ठ बताउंछन् ।  

वूल्विचदेखि ब्राइटनसम्मको एकतर्फी ६९ माइलको दूरी पूरा गरेपछि च्यारिटी यात्रा सम्पन्न हुनेछ ।  बिहान १० बजे वूल्विचबाट शुरु हुने यात्रा पूरा हुन ६ घण्टा लाग्ने अनुमान गरिएको छ ।  

यो च्यारिटी साइकल यात्राको  संयोजनमा  ‘वूल्विच आर्सनल राइडर्स’ क्लबका सदस्यहरू हेल्प नेपाल नेटवर्क यूकेका  प्रशिद्ध प्रधान र सचिन श्रेष्ठ, गैरआवासीय नेपाली संघ यूकेका महासचिव फडिन्द्र भट्टराई, खेलकूद संयोजक ह्यारी गुरूङ, क्याट यूके अध्यक्ष जीवन  सेन , नेपाली युथ एसोसिएशन यू के अध्यक्ष लक्षुमन गुरूङ, सुरज गुरूङ  र अमिर श्रेष्ठ लगायत जुटिरहेका छन् ।

साइकल यात्रा सबैको लागि खुला राखिएको भन्दै भाग लिन ईच्छुक हुनेहरुलाई आयोजक समुहलाई सम्पर्क राख्न आग्रह गरिएको छ ।

इभेन्टको लागि आर्थिक सहयोग संकलनका लागि बुद्ध फाउन्डेसन यूकेको बैँक खाता प्रयोग गरिएको भन्दै आयोजकले निम्नानुसारको खातामा रकम जम्मा गराउन अपील गरेका छन् ।  

Buddha Foundation UK

जस्ट गिभिङ’ मार्फत सहयोग गर्ने लिंक : 

https://www.justgiving.com/fundraising/woolwich-to-brighton-charity-bike-ride