युद्ध सुरु भएयता इरानले इजरायलमाथि हान्यो ४०० बढी ब्यालिस्टिक क्षेप्यास्त्र

इजरायली शहर डिमोनामा इरानले प्रहार गरेको क्षेप्यास्त्रबाट क्षतिग्रस्त संरचना । तस्विर- रोयटर्स

तेहरान । मध्यपूर्व युद्ध सुरु भएदेखि इरानले इजरायलमाथि ४०० भन्दा बढी ब्यालिस्टिक क्षेप्यास्त्र प्रहार गरेको र तीमध्ये ९२ प्रतिशत क्षेप्यास्त्र आकाशमा नै नष्ट गरिएको इजरायली सेनाले आइतबार जनाएको छ ।

दक्षिणी इजरायलका दुई शहरमा इरानी क्षेप्यास्त्र आक्रमणबाट कम्तीमा १७५ जना घाइते भएको भोलिपल्ट यो तथ्याङ्क सार्वजनिक गरिएको हो ।

“इरानले ४०० भन्दा बढी ब्यालेस्टिक क्षेप्यास्त्र प्रहार गरिसकेको छ । हामीसँग ठूलो अवरोध दरहरू छन्,” इजरायली सेनाका प्रवक्ता लेफ्टिनेन्ट कर्णेल नदाभ शोशानीले पत्रकारहरूसँग भने ।

“हामीले लगभग ९२ प्रतिशत बढी क्षेप्यास्त्रलाई आकाशमा नै निष्क्रिय पारयौं,” उनले थपे ।

शनिबार आक्रमण भएका शहरहरूमध्ये एक डिमोना रहेको छ, जुन इजरायलको अघोषित परमाणु शस्त्रागार भएको विश्वास गरिन्छ । उक्त क्षेप्यास्त्रको प्रभाव शहरको आणविक केन्द्रबाट पाँच किलोमिटरको दूरीमा थियो । नजिकैको अर्को शहर अरादका धेरै भवनमा ठूलो क्षति पुगेको छ ।

शनिबार प्रहार गरिएका क्षेप्यास्त्र ब्यालेस्टिक क्षेप्यास्त्रभन्दा फरक नभएको र युद्धका क्रममा अहिलेसम्म यस्ता चारवटा मात्र प्रहार भएको शोशानीले बताए ।

इजरायली सेनाले शनिबार हमला रोक्न नसकेको घटनाबारे अनुसन्धान गर्ने बताएको छ।

“हामीले विगतमा धेरै आक्रमणलाई आकाशमा नै विफल बनाएका छौँ र भविष्यमा पनि यो दर कायम रहने छ,” शोशनीले भने ।

प्रधानमन्त्री बेन्जामिन नेतान्याहूले शनिबार ‘निकै कठिन साँझ’ भएको स्वीकार गर्दै साइरन बज्दा नागरिकलाई सुरक्षा केन्द्रमा जान आग्रह गरेका छन् ।

आइतबार उनले अरादको भ्रमण गरेका छन् । अरादबाट उनले शीर्ष इरानी अधिकारीहरूको खोजी जारी राख्ने प्रतिवद्धता व्यक्त गरे ।

“हामी इरानको आपराधिक गिरोह रिभोलुसनरी 
गाड्र्सलाई कारबाही गरिरहेका छौँ,” नेतान्याहूले घटनास्थलमा पत्रकारहरूसँग भने, “हामी व्यक्तिगत रूपमा उनीहरूको पछि लागेका छौँ, उनीहरूका नेताहरू, उनीहरूको प्रतिष्ठान, आर्थिक सम्पत्ति खोजिरहेका छौँ ।”

इरानी आक्रमणमा तेल अभिभको व्यापारिक क्षेत्रमा आइतबार एक व्यक्ति घाइते भएका बताइएको छ ।