मध्यपूर्व युद्धको असर विश्वव्यापी

युएईको सबैभन्दा ठूलो बन्दरगाह र तेल भण्डारण फुजैराह तेल उद्योग क्षेत्रमा इरानी ड्रोन र क्षेप्यास्त्र आक्रमणपछि लागेको आगो । तस्बिर- रोयटर्स

दुबई, चैत ७ गते । मध्यपूर्वमा तीन हप्तादेखि बढ्दो युद्धबीच इरानले आफ्नो आक्रमणलाई विश्वव्यापी पर्यटन र मनोरञ्जन स्थलमा फैलाउने धम्की दिएको छ ।

इरानी सेनाका उच्च अधिकारीहरूले ‘विश्वका पार्क, मनोरञ्जन क्षेत्र र पर्यटन स्थलहरू’ देशका शत्रुका लागि सुरक्षित नहुने चेतावनी दिएका छन् । यसले इरानले मध्यपूर्व बाहिर पनि आक्रमण गर्ने सम्भावना कायम राखेको देखाउँछ ।

इरानले आक्रमणलाई बढाउँदै आफ्नो खाडी छिमेकीमा असर पुर्‍याइरहेको छ, जबकि हर्मुज जलमार्गमा व्यापार नियन्त्रण जारी राखेको छ । यो मार्ग विश्वको तेल र अन्य महत्त्वपूर्ण वस्तुहरूको लगभग पाँचौँ हिस्सा बोक्ने मार्ग हो ।

इरानी सर्वोच्च नेता मोज्तबा खामेनीले नवरोज पर्वको अवसरमा राष्ट्रका नाममा लिखित सन्देश जारी गर्दै अमेरिकी र इजरायली आक्रमणहरू असफल भएको जिकिर गरेका छन् । उनले इरानी जनताको दृढताको प्रशंसा समेत गरेका छन् ।

उता अमेरिकाले यस क्षेत्रमा थप युद्धपोत र सैनिक पठाउने घोषणा गरेको छ ।

अमेरिकी राष्ट्रपति डोनाल्ड ट्रम्पले सामाजिक सञ्जालमा उनको प्रशासन यस क्षेत्रको सैन्य अभियानलाई क्रमशः घटाउने विकल्पमा विचार गरिरहेको बताएका छन् । तेलको मूल्यमा वृद्धि र अमेरिकी शेयर बजारमा गिरावट आएपछि उनको यस्तो मिश्रित सन्देश आएको हो ।

अमेरिकाले इरानी तेलमा केही प्रतिबन्ध हटाउने घोषणा पनि गरेको छ, जसले मूल्य नियन्त्रण गर्न मद्दत पुग्ने अपेक्षा गरिएको छ । तर उत्पादनमा वृद्धि नभएपछि तेलको आपूर्ति र मूल्यमा ठूलो असर नपर्ने देखिन्छ ।

यसैबीच, इरानले शनिबार बिहान पुनः मिसाइल आक्रमण जारी राखेको इजरायलले बताएको छ भने साउदी अरेबियाले केही घण्टाभित्रै २० ड्रोन निश्क्रिय पारिएको जनाएको छ । त्यस क्षेत्रमा मुख्य तेल प्रतिष्ठानहरू छन्। आक्रमणबाट कुनै मानव क्षति वा संरचनागत हानी भने भएको छैन।

युद्धमा हालसम्म इरानमा एक हजार तीन सयभन्दा बढी, इजरायलमा १५ र पश्चिम बैँकमा चार नागरिकको मृत्यु भएको छ । अमेरिकी सेनाका कम्तीमा १३ सदस्यको पनि मृत्यु भएको छ ।