फिलिपिन्समा ६.९ म्याग्निच्युडको भूकम्प, कम्तीमा ६० को मृत्यु

फिलिपिन्स–मंगलबार राति फिलिपिन्समा ६.९ म्याग्निच्युडको भूकम्प गएको छ। अमेरिकी भूगर्भ सर्वेक्षणका अनुसार भूकम्पको केन्द्रबिन्दु सेबु प्रान्तको बोगो सहरबाट करिब १९ किलोमिटर उत्तरपूर्वमा थियो, जसको गहिराइ लगभग १० किलोमिटर थियो।

मंगलबार स्थानीय समय अनुसार राति १२:०० बजे भन्दा ठीक अगाडि सेबु शहरको तटमा भूकम्प गएको थियो। भूकम्पका कारण विद्युत आपूर्ति बन्द भएको थियो र भवनहरूमा क्षति पुगेको थियो।

बोगो शहर र अन्य प्रभावित शहर र नगरपालिकाहरूले भूकम्पबाट भएको क्षतिको आँकलन गर्दै ‘विपत्तिको अवस्था’ घोषणा गरेका छन्।

फिलिपिन्सको ज्वालामुखी तथा भूकम्प विज्ञान संस्थानले सुनामीसम्बन्धी चेतावनी रद्द गरेको छ। उनले भनेका छन्, “समुद्री सतहको सामान्य अशान्तिका कारण हुने कुनै पनि प्रभाव धेरै हदसम्म हटिसकेको छ।”

भिसायास क्षेत्रमा अवस्थित सेबु शहरको जनसंख्या लगभग दस लाख छ। बीबीसीका अनुसार भूकम्पले धेरै भवन भत्किएका छन्।

भूकम्पका कारण कम्तीमा ६० को मृत्यु भएको जनाइएको छ । अधिकारीहरूले भग्नावशेषमा फसेका मानिसहरूलाई उद्धार गर्ने प्रयास भइरहेको र मृतकको संख्या बढ्न सक्ने बताएका छन्। स्थानीय अधिकारीहरूले भूकम्प गएको क्षेत्रमा मानिसहरूलाई सतर्क रहन आग्रह गरेका छन्।