हङकङ आगलागी अपडेटः १२८ को मृत्यु, नेपालीहरू सुरक्षित

हङकङको ताइपोस्थित वाङ फुक कोर्ट आवासीय कम्प्लेक्समा भएको भीषण आगलागीमा परी एक अग्निनियन्त्रकसहित १२८ जनाको दुःखद निधन भएको छ । घटनामा ७९ जना घाइते भएका छन्, जसमध्ये १२ जना अग्निनियन्त्रक छन् । उनीहरु विभिन्न अस्पतालमा उपचाररत छन्।

अधिकारीहरूका अनुसार २ सयभन्दा बढी व्यक्तिको अवस्था अझै अज्ञात छ। यसैगरि सात इन्डोनेसियाली घरेलु कामदारको मृत्यु भएको पुष्टि भएको छ भने १९ फिलिपिनो हराइरहेका छन्।

बुधबार दिउँसो सुरु भएको आगो केही मिनेटमै ‘नम्बर ५ फायर अलार्म’ मा पुगेको थियो र केही घण्टामै ८ ब्लकमध्ये ७ मा फैलिएको थियो। यो घटनालाई हङकङमा पछिल्लो ७० वर्षमा भएको सबैभन्दा ठूलो विपत्तिको रूपमा लिइएको छ ।

हङकङस्थित एनआरएनएकी अभियन्ता तथा समाजसेवी टीका (राधिका) गुरुङले उक्त घटनामा कुनै पनि नेपाली नपरेको जानकारी प्राप्त भएको जनाइन् । ताई पो क्षेत्र केही टाढा भएकाले हालसम्म कुनै पनि नेपाली प्रभावित नभएको उनले बताएकी छन्।

यसैगरी हङकङलाइ व्यवसायिक कर्मथलो बनाउंदै आएका एनआरएन अभियन्ता एवम् व्यवसायी कृष्ण पाण्डेले पनि घटनामा कुनै नेपालिनपरेको जानकारी दिए । उक्त आगलागी क्षेत्रमा नेपालीहरुको बसोवास अत्यन्त कम भएकोले कुनैपनि नेपालीहरू दुर्घटनामा नपरेको उनले जनाए।

हङकङमा हजारौँ नेपाली सामान्य रोजगारीदेखि व्यापार व्यवसायसम्ममा संलग्न छन् र धेरैले आवासीय अपार्टमेन्ट खरिद गरेर बसोबास गर्दै आएका छन्।

पीडितलाई सहयोग गर्न हङकङस्थित नेपाली संघसंस्थाहरूले सहयोग अभियान सुरु गरेका छन्। एनआरएनए हङकङले पहिलो चरणमा दश हजार हङकङ डलर सरकारी कोषमा उपलब्ध गराउने निर्णय गरेको छ । साथै सम्पूर्ण नेपाली संघ–संस्था, व्यवसायी तथा समुदायलाई सरकारी आधिकारिक खातामार्फत सहयोग गर्न अपिल गरेको छ ।

नेपाल क्लब हङकङकी अध्यक्ष तथा हङकङ नेपाली महासंघकी पूर्व अध्यक्ष रिता गुरुङले यो पीडा केवल पीडितहरूको मात्र नभई सम्पूर्ण हङकङवासीको साझा दुःख भएको उल्लेख गर्दै सबैलाई सहयोगका लागि हातेमालो गर्न आग्रह गरेकी छन्।

हङकङ सरकारले प्रभावित परिवारहरूका लागि ३ सय मिलियन हङकङ डलर पुँजीसहित ‘सपोर्ट फण्ड फोर वाङ फुक कोर्ट इन् ताइपो’ स्थापना गरेको छ । मृतक परिवारलाई दिइने राहत रकम एक लाख ५० हजार हङकङ डलरबाट बढाएर दुई लाख हङकङ डलर पुरयाएको छ ।

आज शनिबारदेखि तीन दिन देशव्यापी शोक घोषणा गरिएको छ, सबै १८ जिल्लामा शोक पुस्तिका राखिएको छ र सोमबारसम्म चिनियाँ तथा हङकङ झण्डा आधा झुकाइनेछन्।

आगलागीको कारणबारे प्रारम्भिक छानबिनले देखाएको अनुसार सन् २०२४ जुलाईदेखि मर्मत कार्य हुँदै आएको भवनमा बाहिरबाट बाँसको स्काफोल्डिङ र प्रज्वलनशील हरियो नेट प्रयोग गरिएको थियो। अत्यधिक ज्वलनशील स्टाइरोफोमका कारण आगो अनियन्त्रित गतिमा फैलिएको पुष्टि भएको छ।

घटनामा फौजदारी अनुसन्धान अघि बढाइएकाले हालसम्म ११ जना पक्राउ परेका छन् । ३ जना मानवहत्या (म्यानस्ल्याटर) अभियोग र ८ जना आइसीएसीद्वारा भ्रष्टाचार र अनियमितता आरोपमा पक्राउ परेका हुन् । आगो नियन्त्रणमा आए पनि भवनभित्रको तापक्रम ५०० डिग्री सेल्सियससम्म पुगेकाले उद्धार र शव पुनःप्राप्ति कार्य चौंथो दिन पनि कठिन भएको अधिकारीहरूले जनाएका छन्।