लण्डन हिथ्रो विमानस्थलमा तेस्रो रनवे निर्माणको टुंगो छिट्टै, दुई कम्पनीबीच प्रतिस्पर्धा

लन्डन । बेलायतको प्रमुख अन्तर्राष्ट्रिय विमानस्थल हिथ्रोमा तेस्रो रनवे निर्माण गर्ने बहुप्रतीक्षित निर्णय अब केही हप्ताभित्रै हुने भएको छ। लामो समयदेखि विवादमा रहेको यो परियोजना अहिले अन्तिम चरणमा पुगेको छ, जसमा दुई ठूला समूहबीच यसको जिम्मेवारी लिने प्रतिस्पर्धा तीव्र छ।

एकातिर, हिथ्रो एयरपोर्ट लिमिटेड आफैँ मैदानमा छ भने अर्कोतिर  होटल व्यवसायी सुरेन्द्र अरोराको नेतृत्वमा रहेको अरोरा समूह प्रतिस्पर्धामा उत्रिएको छ। दुवै पक्षले लागत, पारदर्शिता र दक्षताका आधारमा आ-आफ्ना प्रस्ताव पेस गरेका छन्।

हिथ्रो व्यवस्थापनले आफ्नो अनुभव र पूर्वाधार क्षमतालाई जोड दिँदै परियोजना आफैँले सञ्चालन गर्नुपर्ने तर्क प्रस्तुत गरेको छ। जबकि अरोरा समूहले यात्रु र करदाताको हितमा बढी प्रतिस्पर्धात्मक मूल्यमा काम सम्पन्न गर्न सकिने दाबी गरेको छ।

ब्रिटिश सरकारका अनुसार तेस्रो रनवे निर्माण परियोजना देशको अर्थतन्त्र र अन्तर्राष्ट्रिय उडान क्षमता अभिवृद्धिका लागि महत्त्वपूर्ण छ।

यसको निर्माण सम्पन्न भएपछि हिथ्रो विमानस्थलले वार्षिक रूपमा लाखौँ अतिरिक्त यात्रु र उडानहरूलाई सहजतापूर्वक व्यवस्थापन गर्न सक्नेछ।तेस्रो रनवे निर्माणको स्वीकृति पाएको खण्डमा  अगामी एक  दशकभित्रै पूरा हुनेछ भने युरोपकै व्यस्त हवाइ केन्द्र हुने बीबीसीले उल्लेख गरेको छ ।

यद्यपि, यो योजना पर्यावरणीय प्रभाव, ध्वनि प्रदूषण, र स्थानीय बासिन्दाको स्थानान्तरण जस्ता विषयहरूमा आलोचनाको केन्द्र बनेको छ। वातावरणविद्हरूले यो परियोजनालाई रोक्न सरकारलाई निरन्तर दबाब दिइरहेका छन्।

अन्तिम निर्णय केही हप्ताभित्र सार्वजनिक हुने बताइएको छ। यसैले विमानन उद्योग, लगानीकर्ता र स्थानीय समुदायको ध्यान हिथ्रोतर्फ केन्द्रित भएको छ।