हमासले सार्वजनिक गर्‍यो विपिनसहित ४८ बन्दीहरूको ‘बिदाइ तस्वीर’

काठमाडौँ । प्यालेस्टाइनी समूहले इजरायलको विस्तारित स्थल आक्रमण र हवाई हमलाले गाजामा बन्धक बनाइएका व्यक्तिहरूको सुरक्षालाई खतरामा पारेको बताएको छ।

हमासको सशस्त्र समूहले शनिबार गाजामा बन्धक बनाइएका ४८ इजरायलीहरूको “बिदाइ तस्बिर” भनी एउटा संकलित तस्बिर अनलाइनमा पोस्ट गरेको छ। संकलित तस्वीर’मा नेपालका विपिन जोशीको पनि तस्वीर समावेश गरेको छ।

‘बिदाइ तस्वीर’ भनेर सार्वजनिक गरिए पनि उनीहरूको अवस्थाबारे केही खुलाइएको छैन ।

यो तस्बिरमा जीवित र मृतक सबै बन्धकहरूको अनुहार छन् र प्रत्येकको नाममुनि “रोन अराड” लेखिएको छ, जसले सन् १९८६ मा लेबनानमा बेपत्ता भएका इजरायली वायुसेनाका क्याप्टेनलाई संकेत गर्छ।

रोन अराडको एफ-४ फ्यान्टम विमानले दक्षिणी लेबनानमा आक्रमणको क्रममा समयअगावै बम विस्फोट भएको थियो। उनलाई अमाल आन्दोलनले पक्राउ गरेको थियो र पछि हिजबुल्लाहलाई हस्तान्तरण गरिएको थियो। अराडको मृत्यु भएको मानिन्छ,तर उनको अन्तिम अवस्थाबारे ठोस प्रमाण उपलब्ध छैन।

हमासले जारी गरेको तस्बिरसँगै एउटा सन्देश पनि थियो, जसमा लेखिएको छ: “नेतान्याहुको अस्वीकार र जामिरको आत्मसमर्पणका कारण गाजा सिटीमा सैन्य कारबाही सुरु हुँदा यो बिदाइ तस्बिर हो।”

यो सन्देशले इजरायली प्रधानमन्त्री बेन्जामिन नेतान्याहुले गाजामा नरसंहारकारी युद्ध अन्त्य गर्न हमाससँग कुनै सम्झौता गर्न बारम्बार अस्वीकार गरेको र इजरायली सेना प्रमुख इयाल जामिरले सरकारको गाजा सिटी “कब्जा” योजनाको सार्वजनिक विरोध गरे पनि विस्तारित स्थल र हवाई आक्रमणको नेतृत्व गरेको कुरालाई संकेत गर्छ।

इजरायली अधिकारीहरूले गाजामा करिब २० बन्धकहरू जीवित रहेको विश्वास गरेका छन्, जबकि अमेरिकी राष्ट्रपति डोनाल्ड ट्रम्पले २० भन्दा कम जीवित हुन सक्ने बताएका छन्। ट्रम्प र नेतान्याहुले बारम्बार जीवित र मृतक सबै बन्धकहरूलाई फिर्ता ल्याउने र हमासलाई “नष्ट” गर्ने बताएका छन्।

हमासले निरन्तर चेतावनी दिँदै आएको छ कि इजरायलको तीव्र आक्रमण र स्थल आक्रमणले बन्धकहरूको ज्यानलाई खतरामा पार्नेछ, केही बन्धकहरू पहिल्यै इजरायली बम हमलामा मारिएका छन्। सशस्त्र प्यालेस्टाइनी समूहले बन्धकहरू गाजा सिटीका “छरिएर रहेका छिमेक”मा राखिएको दाबी गरेको छ।

हमासको यो चेतावनी शनिबार हजारौँ इजरायली तेल अभिभ र अन्य सहरहरूमा सडकमा उत्रने अपेक्षा गरिएको केही घण्टा अगाडि आएको हो। उनीहरूले सरकारको निन्दा गर्दै युद्ध तत्काल र पूर्ण रूपमा अन्त्य गर्न र सबै बन्धकहरूलाई फिर्ता ल्याउन माग गर्नेछन्।

यस महिनाको सुरुमा हमासले दुई इजरायली बन्धकहरूको भिडियो जारी गरेको थियो। जुन गत महिना दुई इजरायली बन्धकहरूको भिडियो प्रसारण गरेको लगभग एक महिनापछि आएको थियो। जसमध्ये एक जनाले आफ्नै चिहान खनिरहेको देखिएको थियो।

गाजाको प्यालेस्टाइनी स्वास्थ्य मन्त्रालयका अनुसार सन् २०२३ को अक्टोबरमा युद्ध सुरु भएदेखि इजरायलद्वारा कम्तीमा ६५ हजार २ सय ८ प्यालेस्टाइनी मारिएका छन् र १ लाख ६६ हजार २ सय ७१ घाइते भएका छन्। मार्च १८ मा इजरायलले हमाससँगको युद्धविराम तोडेपछि १२ हजार ६ सय ५३ व्यक्ति मारिएका छन् र ५४ हजार २ सय ३० घाइते भएका छन्।

इजरायलले गाजालाई भोकमरीमा पारिरहँदा पछिल्लो एकै दिनमा सहायता खोज्ने चार जना मारिएका छन् र १८ घाइते भएका छन्। अहिलेसम्म प्यालेस्टाइनी सहायता खोज्नेहरूको कुल मृत्यु संख्या २ हजार ५ सय १८ पुगेको छ।

इजरायलले सम्पूर्ण क्षेत्रलाई युद्धक्षेत्र घोषित गरेर आक्रमणमा उत्रिएपछि पछिल्लो एक दिनमा गाजा सिटीमा दर्जनौं मानिस मारिएका छन्। घरहरूमा आक्रमण गरि ध्वस्त पारिएको छ र हजारौंलाई भाग्न बाध्य पारिएको छ।

अल जजीराबाट