एनआरएनए यूके बैठक: असन्तुष्ट पक्षलाई मूल प्रवाहमा आउन आव्हान

लेस्टर (बेलायत) । गैरआवासीय नेपाली संघ (एनआरएनए) यूकेले संघको असन्तुष्ट पक्षधरलाई मूल प्रवाहमा आउन आव्हान गरेको छ । 

गत जुलाईमा निर्वाचित भएपछि एनआरएनए यूके अध्यक्ष राजेन्द्र पुडासैनीको अध्यक्षतामा बेलायतस्थित लेस्टर शहरमा गत सोमबार बसेको कार्यसमितिको पूर्ण बैठकले एनआरएनएमा एक हुनुको विकल्प नरहेको ठहर गर्दै बृहत्त एकताका लागि असन्तुष्ट पक्षहरुलाई आव्हान गरेको हो । 

कार्यसमिति बैठकले बेलायतस्थित नेपालीहरुलाई आपतकालिन अवस्थामा सहयोग गर्न भर्चुअल हेल्पलाइन सुरु गरेको छ । उक्त हेल्पलाइनमा उपाध्यक्षहरु कृष्ण भण्डारी, लिलाराम निउरे, रक्षा थापा, उज्वल कार्की, रामप्रसाद कंडेल र महिला सचिव छमकला पोखरेल छन् ।

एनआरएनए यूकेले बेलायतस्थित आपतमा परेका नेपालीहरुलाई सम्पर्क आउन आव्हान गरेको छ । त्यस्तै, बैठकले एनआरएनए यूके काउन्सिल बैठक आगामी नोभेम्बर भित्रै गर्ने निर्णय गरेको छ भने एनआरएनए यूकेले एक सचिवालय समेत गठन गरेको छ । सचिवालयमा अध्यक्ष पुडासैनी, उपाध्यक्ष कृष्ण भण्डारी, उपाध्यक्ष रक्षा थापा, महासचिव दिवाकर पाण्डेय, कोषाध्यक्ष सरोज थापा र प्रवक्ता श्याम लुईटेल छन् ।

बैठकले एनआरएनए यूकेलाई बेलायतभर तल्लो तहमा लैजान कार्यक्रमसहित विभागहरु गठन गरेको छ । एनआरएनए यूके अध्यक्ष पुडासैनीले क्षेत्रीय रुपमा कार्यसमितिका बैठकहरुलाई लैजाने क्रममा लेस्टरमा भौतिक बैठक राखिएको जनाए ।

उनले हरेक राज्यमा कम्तिमा एक भौतिक बैठक गर्ने जानकारी दिए । एनआरएनए यूके निर्वाचनको समिक्षा गर्दै बैठकले सदस्यता सहजीकरण र शुल्क भुक्तानी प्रक्रिया सहज बनाउन कार्य गर्ने निर्णय गरेको छ । 

बैठकमा अध्यक्ष पुडासैनीले एनआरएनए यूके खाता हस्तान्तरण प्रक्रियामा रहेको जानकारी बैठकलाई गराएको महासचिव दिवाकर पाण्डेयले बताए । उनकाअनुसार एनआरएनए यूकेले आइसीसी डेलिगेट्सको नाम लिस्ट केन्द्रमा पठाइएको छ ।

आगामी अक्टोबर ११ देखि १४ सम्म अन्तरराष्ट्रिय समन्वय परिषद् (आइसीसी) महाधिवेशन काठमाडौंमा हुँदैछ ।

बैठकले च्यारिटी विभाग पनि गठन गरेको छ जसमा उपाध्यक्ष रक्षा थापा, उपाध्यक्ष कृष्ण भण्डारी, उपाध्यक्ष उज्वल कार्की, उपाध्यक्ष लिलाराम निउरे, महिला संयोजक बिनु लामिछाने, सदस्य शिवकान्त खराल र इंग्ल्याण्ड राज्य समन्वय परिषद् अध्यक्ष राममाया थापा विष्ट छन् ।

त्यसैगरी, खेलकुद विभागको जिम्मेवारी उपाध्यक्ष उज्वल कार्कीलाई दिइएको छ । उक्त विभागमा ह्यारी गुरुङ र प्रमोद भण्डारी छन् । त्यस्तै, युवा विभागको जिम्मेवारी युवा संयोजक बासुदेव पोखरेललाई दिइएको छ । 

विद्यार्थीहरुको समस्या सम्बोधनका लागि एनआरएनए यूकेले विद्यार्थी विभाग समेत गठन गरेका छन् । विद्यार्थी विभाग संयोजकको जिम्मेवारी कार्यसमिति सदस्य बिष्णुभक्त भट्टराईलाई दिइएको छ । उनले विभागलाई केही सदस्य राखेर विस्तार गर्नेछन् । 

भाषा साहित्य र संस्कृति विभागको संयोजन कार्यसमिति सदस्य गोपी सापकोटाले लिएका छन्।

त्यस्तै, सांस्कृतिक विभागको संयोजक सचिव कृष्ण देवकोटालाई दिइएको छ । उक्त विभागमा कार्यसमिति महिला सचिव छमकला पोखरेल, सदस्य लोकनाथ अधिकारी र पत्रकार प्रकाश कंडेल छन् । 

महिला विभागको संयोजक स्कटल्याण्ड उपाध्यक्ष कमला श्रेष्ठलाई दिइएको छ भने उक्त विभागमा बिनु लामिछाने र छमकला पोखरेल छन् । आर्थिक विभागको संयोजक जिम्मेवारीमा कोषाध्यक्ष सरोज थापा छन् भने उनको विभागमा सहकोषाध्यक्ष दिपक तिमल्सेना छन्।

त्यसैगरी, कार्यसमिति बैठकले पर्यटन विभाग समेत गठन गरेको छ । उक्त विभागको जिम्मेबारी उपाध्यक्ष रामप्रसाद कंडेललाई दिइएको छ । उक्त विभागमा सदस्यद्वय मोहन ओली र दिनेश परियार छन् ।

त्यस्तै, सूचना तथा संचार विभागको संयोजक प्रवक्ता श्याम लुईटेललाई दिइएको छ । उक्त विभागमा दिनेश परियार, बिमल सापकोटा र अन्जु न्यौपाने छन् । 

एनआरएनए यूके संघसंस्था विभाग संयोजकको जिम्मेवारी स्वयं अध्यक्ष पुडासैनीले लिएका छन्। उक्त विभागमा  उपाध्यक्ष रक्षा थापा, स्कटल्याण्ड राज्य समन्वय परिषद् अध्यक्ष शेरबहादुर केसी, वेल्स राज्य समन्वय परिषद् अध्यक्ष बिकास रानाभाट, नर्दन आयरल्याण्ड राज्य समन्वय परिषद् अध्यक्ष पूर्णेश्वर कंडेल र सदस्य दीपक गैर छन् ।

त्यसैगरी नेपाली नागरिकता निरन्तरताका लागि पहल कदमी गर्न नागरिकता विभाग गठन गरिएको छ । नागरिकता विभागको संयोजक जिम्मेवारीमा कृष्ण भण्डारीलाई दिइएको छ ।

उक्त विभागमा लिलाराम निउरे, डिएन खरेल, श्याम लुईटेल र दिपक गैरे छन् । एनआरएनए यूकेको ट्रस्टीमा अ्रध्यक्ष पुडासैनीसहित कृष्ण भण्डारी, रक्षा थापा, महासचिव दिवाकर पाण्डेय र कोषाध्यक्ष सरोज थापा छन् । 

बैठकले एनआरएनए यूकेको पूर्व अध्यक्षहरु रहेको संरक्षक परिषद् समेत गठन गरेको छ ।

बैठकले गोर्खा तथा जेष्ठ नागरिक विभाग पनि गठन गरेको छ । उक्त विभागको संयोजकको जिम्मेवारी कार्यसमिति सदस्य दिनेश परियारलाई दिइएको छ । विभागमा बालकृष्ण भुसाल र झपेन्द्र सापकोटा छन् । 

कार्यसमितिको बैठकले कार्यसमितिमा मनोनित गर्ने सदस्यहरु र सल्लाहकारका बारेमा ठोस कार्ययोजनासहित खाका प्रस्तुत गर्न अध्यक्ष पुडासैनीलाई जिम्मेवारी दिइएको छ । 

बैठकमा स्कटल्याण्ड अध्यक्ष शेरवहादुर केसीले स्कटल्याण्डमा हेल्पलाइन स्थापना गरि काम सुरु गरेको जानकारी दिए । उनले आफ्ना कामहरुको फेहरिस्त प्रस्तुत गरेका थिए ।

महासचिव पाण्डेयले संचालन गरेको बैठकमा आइसीसी सदस्यहरु तुंगभद्र भुसाल, र छबिलाल अर्यालको समेत उपस्थिति थियो । उक्त बैठकमा शपथ ग्रहण गर्न छुटेका कार्यसमिति सदस्यहरुलाई अध्यक्ष पुडासैनीले शपथ ग्रहण गराएका थिए ।