ट्रम्प पुटिन शिखर बैठक ठोस सहमति बिनै टुंगियो

अलास्का । अमेरिका र रूसबीच शुक्रबार अलास्काको एंकोरेज सहरमा सम्पन्न शिखर बैठकलाई अमेरिकी राष्ट्रपति डोनाल्ड ट्रम्पले ‘अत्यन्तै फलदायी’ भएको बताएका छन् तर युक्रेन युद्ध समाधानका लागि अपेक्षित ठोस सहमति भने हासिल हुन सकेन।

झन्डै तीन घण्टा लामो वार्तापछि आयोजित संयुक्त पत्रकार सम्मेलनमा राष्ट्रपति ट्रम्प र रुसी राष्ट्रपति भ्लादिमिर पुटिनले केही महत्वपूर्ण विषयमा सहमति भएको जनाए पनि युद्धविराम वा अन्तिम समाधानसम्बन्धी ठोस निर्णय सार्वजनिक गरिएको थिएन।

ट्रम्पले बैठकलाई ‘धेरै उत्पादक’ भनेर वर्णन गर्दै सुनाए ‘धेरै बुँदाहरूमा हामी सहमत भयौं । म भन्न चाहन्छु कि केही ठूला बुँदाहरू ।’ ‘तर केही बाँकी छन्’, उनले थपे, ‘केही त्यति महत्त्वपूर्ण छैनन् । एउटा सायद सबैभन्दा महत्त्वपूर्ण छ, तर हामीसँग त्यहाँ पुग्ने धेरै राम्रो मौका छ ।’

राष्ट्रपति पुटिनले वार्तालाई आपसी सम्मान र रचनात्मक वातावरणमा सम्पन्न भएको उल्लेख गर्दै युक्रेनको सुरक्षा सुनिश्चित गर्नु आवश्यक रहेको धारणा राखे ।

साथै, उनले द्वन्द्वका ‘मूल कारणहरू’ समाधान नगरी स्थायी शान्ति सम्भव नहुने भन्दै युरोपेली मुलुकहरूलाई उक्साउने प्रयास नगर्न आग्रह गरे ।

यद्यपि दुबै नेताले संवाद र समझदारीलाई निरन्तरता दिने प्रतिबद्धता व्यक्त गरेका छन् । प्रारम्भिक चरणको यो बैठक तत्कालिक उपलब्धिबिना टुंगिएको देखिएको छ ।