गाजामा द्वन्द्व अन्त्यका लागि युद्धविराम प्रस्तावमा तुरुन्तै वार्ता गर्न हमास तयार

गाजा, असार २१ गते । हमासले गाजामा जारी द्वन्द्व अन्त्य गर्न युद्धविराम प्रस्तावमा तुरुन्तै वार्ता गर्न आफू तयार रहेको जनाएको छ । यो घोषणा अन्य प्यालेस्टिनी पक्षहरूसँगको परामर्शपछि गरिएको हो, जसको सन्दर्भ इजरायली प्रधानमन्त्री बेन्जामिन नेतान्याहुको अमेरिकाको प्रस्तावित भ्रमणसँग पनि जोडिएको छ ।

अमेरिकी राष्ट्रपति डोनाल्ड ट्रम्पले हालै गाजाको अवस्थाबारे चासो व्यक्त गर्दै युद्ध अन्त्यका लागि पहल गर्न आग्रह गरेका छन् । हमासले अमेरिका, कतार र इजिप्टको मध्यस्थतामा तयार पारिएको युद्धविराम प्रस्तावको मस्यौदामा उल्लेखित सर्तहरूलाई सकारात्मकरूपमा लिँदै वार्ताको प्रक्रियामा सहभागी हुने तयारी रहेको विज्ञप्तिमार्फत जनाएको छ ।

यसका साथै, हमाससँग आबद्ध इस्लामिक जिहाद समूहले पनि वार्तालाई समर्थन जनाउँदै इजरायलले बन्धक मुक्तिपछि पुनः आक्रमण नगर्ने स्पष्ट सुनिश्चितता आवश्यक भएको बताएको छ । हमासको घोषणाबारे पत्रकारले सोधेको प्रश्नमा राष्ट्रपति ट्रम्पले यसलाई सकारात्मक सङ्केतको रूपमा लिँदै यो द्वन्द्व अब अन्त्य हुनुपर्ने धारणा व्यक्त गरेका थिए ।

हमासले इजरायली क्षेत्रमा हमला गरेपछि गाजामा सन् २०२३ अक्टोबर ७ बाट हिंसात्मक सङ्घर्ष सुरु भएको थियो । युद्धविरामका लागि यसअघि पनि दुईपटक अस्थायी सहमति भएको थियो, जसमा इजरायली बन्धकहरू साटो प्यालेस्टिनी कैदीहरूलाई मुक्त गरिएको थियो ।

इजरायली प्रधानमन्त्री नेतान्याहूले हाल गाजामा रहेका सबै इजरायली बन्धकहरूलाई सुरक्षित घर फर्काउने प्रतिबद्धता जनाएका छन् ।

यसैबीच, राष्ट्रपति ट्रम्पले गाजाका सर्वसाधारणको सुरक्षाका लागि आफू गम्भीर रहेको धारणा व्यक्त गरेका छन् ।