शनिबार, साउन ५, २०८१
16:53 | २१:३८

श्रीमतीको हत्या गरी फरार श्रीमान् र जेठाजु पक्राउ

रासस अप्रिल २२, २०२४

धनुषा, वैशाख १०- धनुषामा एक महिलाको हत्या गरेको आरोपमा उनका श्रीमान् र जेठाजु पक्राउ परेका छन्।

पक्राउ पर्नेमा धनुषाको सहिदनगर नगरपालिका–७ नेमुवाटोलका ५५ वर्षीय सुदीप ठाकुर र ६० वर्षीय उदित ठाकुर छन् । दुवैमाथि ४५ वर्षीया रेखादेवी ठाकुरको हत्या गरेको आरोप छ।

सात महिनाअघि श्रीमतीको हत्या गरी सुदीप आफ्ना दाइ उदितसँगै फरार थिए।  दुवैजनालाई धनुषा प्रहरीले पक्राउ गरेको हो ।

पक्राउ परेका सुदीप रेखादेवीका श्रीमान् तथा उदित जेठाजु रहेको जिल्ला प्रहरी कार्यालयका प्रवक्ता एवं प्रहरी नायव उपरीक्षक रञ्जन अवालेले जानकारी दिए।

गत कात्तिक १० गते रेखादेवीको उनका श्रीमान् सुदीपसँग विवाद भएको थियो। विवादकै क्रममा सुदीपले टाउकोमा बञ्चरो प्रहार गरेपछि रेखादेवीको घटनास्थलमै मृत्यु भएको थियो। 

घटनाको भोलिपल्ट सुदीपले आफ्नै घरभित्र खाल्डो खनी रेखादेवीको शव पुरेका थिए। उनले घटनाबारे सहोदर दाजु उदितलाई जानकारी गराएको अनुसन्धानका क्रममा खुलेको प्रहरी नायव उपरीक्षक (डिएसपी) अवालेले बताए।

‘घटनापछि दुवै दाजु–भाइ भारत भागेका थिए,’ डिएसपी अवालेले भने।

कात्तिक ३० गते घर फर्किएका दाजुभाइले खाल्डोबाट रेखादेवीको शव निकाली बोरामा हालेर सहिदनगर–७ नेमुवाटोल नजिकै खोल्सामा फालेको खुलेको छ। 

हत्याको लामो समयपछि आमा बेपत्ता भएको बारेमा रेखादेवीका छोराले प्रहरीलाई खबर गरेको डिएसपी अवालेले बताए।

अनुसन्धानका क्रममा रेखादेवीको हत्या भएको खुलेको उनले बताए।

डिएसपी अवालेका अनुसार घटनास्थलबाट हत्यामा प्रयोग भएको बञ्चरो र कोदालो पनि प्रहरीले बरामद गरेको छ।  शवको टुक्रा पनि फेला परेको प्रहरीले जनाएको छ।

घटनाबारे प्रहरीले थप अनुसन्धान भइरहेको डिएसपी अवालेले जानकारी दिए। 

प्रतिक्रियाहरू

सम्बन्धित सामग्रीहरू