शनिबार, साउन ५, २०८१
17:31 | २२:१६

लण्डन आइपुगे मह जोडी

नेपाली लिङ्क डिसेम्बर २१, २०२३


लन्डन । वरिष्ठ हास्यकलाकारद्वय मदनकृष्ण श्रेष्ठ र हरिवंश आचार्य (मह) लन्डन आइपुगेका छन् ।

‘मह जोडी यूके टुर’ का लागि कलाकारद्वय बिहीबार साँझ हिथ्रो उत्रिएका हुन् । महका साथ मदनकृष्णका छोरा यमन श्रेष्ठ, छोरी सराना र आचार्यकी जीवनसंगिनी रमिला पनि छन् ।

मह जोडी तथा टोलीका अन्य सदस्यलाई आयोजक द गोर्खा सेन्टरका संस्थापक तथा सिइओ भीम तामाङ लगायत स्वयमसेवक युवा र विभिन्न संघसंस्थाका प्रतिनिधिले विमानस्थलमा स्वागत गरेका थिए । 

लण्डन आइपुगेपछि कलाकार मदनकृष्ण श्रेष्ठले ठट्यौलो शैलीमा भने, “बचेखुचेको शक्ति प्रदर्शन गर्ने हो। रमाइलो हुन्छ। अल्डरशट र ह्यारोमा अवश्य आउनु होला ।”

यसैगरी हरिवंश आचार्यले भने, “यहाँहरुलाई भेट्न हामी बेलायत आइपुग्या छौं । भेटम्ला, रमाइलो गरम्ला । राजनीतिक परिस्थिति ३०-४० वर्षदेखि चेन्ज भएको छैन। सुध्र भन्ने हो, सुध्र्या छैन भन्ने हो, उध्रेको छ भन्ने हो। विसंगतिको बारेमा नै हाम्रो प्रस्तुति हुन्छ ।”

उनले विमानस्थलमा आफूहरुलाई भव्य स्वागत गर्ने सबै संघसंस्थालाई धन्यवाद दिंदै आउँदो शनिबार तथा आइतबार भेट हुने विश्वास व्यक्त गरे। 

“गीत संगीत पनि हुन्छ। तपाईंहरुलाई रमाइलो गर्ने कोशिश गर्छौं”- आचार्यले भने।

कार्यक्रमका आयोजक लन्डनस्थित द गोर्खा सेन्टरका सीइओ भीम तामाङले तयारी भव्य भैरहेको बताए । “लजिस्टिक्सको काम करिब करिब पुरा गरिसकेका छौं। यो कार्यक्रम भव्य गराउन कहीं पनि नचुक्ने गरी हामी तयारी गरिरहेका छौं,” उनले भने।


मह जोडी टुर अन्तर्गत पहिलो कार्यक्रम यही शनिबार (२३ डिसेम्बर) अपरान्ह ४ बजेदेखि हयारोस्थित ह्यारो लिजर सेन्टर र दोश्रो कार्यक्रम आइतबार, २४ डिसेम्बर अपरान्ह ४ बजेदेखि अल्डरसटस्थित एम्पायर हलमा हुँदैछ ।

ह्यारोमा चर्चित गायक प्रकाश सपुत, यमन श्रेष्ठ, शर्मिला बर्देवा लगायत कलाकारहरुको समेत प्रस्तुति रहने आयोजकले जनाएका छन् । अल्डरसटमा स्थानीय कलाकार र गत सिजनका ‘भ्वाइस अफ नेपाल’ विजेता करण राईले पनि प्रस्तुति दिनेछन् ।


कसरी किन्ने टिकट?

आयोजकका अनुसार तलका दुई शहरमा क्लिक गरेर टिकट किन्न सकिन्छ:

ह्यारो:

अल्डरशट:

द गोर्खा सेन्टरले एडभान्समा टिकट लिए जम्मा २५ पाउण्ड एवं विद्यार्थी र ६० वर्षमाथिका दर्शकका लागि २० पाउण्ड शुल्क राखेको छ । टिकट सम्बन्धी कुनै पनि जिज्ञासा भए मधु गुरुङ (07585806914) र प्रतिमा जोशी (07793055224) लाई सम्पर्क गर्न पनि आयोजकले आग्रह गरेका छन्।

यो कार्यक्रमबाट वचत भएको सम्पूर्ण रकम गोर्खा भेट्रानहरुलाई मद्दत गर्न खर्च गरिने द गोर्खा सेन्टरले जनाएको छ। आयोजकले कार्यक्रममा उत्साहजनक सहभागिताका लागि सबै बेलायतवासी नेपालीलाई अपिल गरेका छन् ।

प्रतिक्रियाहरू

सम्बन्धित सामग्रीहरू