सोमबार, साउन ७, २०८१
11:01 | १५:४६

बेलायतको क्रिकेट क्लबले जुरायो नेपाली खेलाडीलाई अवसर

नेपाली लिङ्क नोभेम्बर २, २०२२

नेपाली महिला राष्ट्रिय क्रिकेट टोली सम्मिलित नेपाल क्रिकेट सङघ (क्यान –११) र बेलायतको मेरिलेबोन क्रिकेट क्लब (एमसिसी) का खेलाडीहरु मैत्रीपूर्ण खेलपछि सेल्फी लिंदै । तस्बीर= धनबहादुर गुरुङ/रासस

लण्डन । बेलायतको पुरानो क्रिकेट क्लब मेरीलिवोन क्रिकेट क्लब (एमसिसी) को महिला टोली अहिले नेपालमा छ । नेपाली महिला टोलीसँग क्रिकेट खेल्न सो टोली नेपाल आएको हो ।

यही कात्तिक ५ गतेदेखि नेपाल भ्रमणमा रहेको एमसिसीको टोलीले छ मैत्रीपूर्ण खेल खेल्यो । उसले दुई खेल जितेर चारवटा हारयो ।

आइसिसीको यु–१९ र मिक्स ११ टोलीलाई हराएको एमसिसीले नेपाली महिला राष्ट्रिय क्रिकेट टोली सम्मिलित नेपाल क्रिकेट संघ (क्यान–११) सँगको सबै खेल भने हारयो । 

खेलमा हारजितभन्दा पनि अनुभव आदान–प्रदान उदाहरणीय बनेको नेपाली टोलीकी कप्तान रुबिना क्षेत्रीले बताइन् । “खेल जिते पनि हामीले राम्रो खेल्न सकेनौँ, हामीलाई ४० ओभरको क्रिकेट खेल्ने बानी  छैन”, उनले भनिन्, “क्रिकेटको पुरानो क्लबसँग खेल्नु ठूलो कुरा हो, उहाँहरूबाट धेरै सिकियो ।” 

एमसिसीको टूर नेपाल आउनु आफूहरूका लागि सिक्ने अवसर भएको प्रशिक्षक जगत् टमाटाले बताए । “एमसिसीले एकदमै राम्रो टोली लिएर आएको थियो, उहाँहरूसँग खेल्दा खेलाडीमा आत्मविश्वास बढेको छ”, उनले भने, “सबै खेल जित्यौँ, हाम्रा लागि राम्रो रह्यो ।”

टोलीसँग खेलेर ४० ओभर खेल कसरी खेल्ने, आफूलाई मानसिकरूपमा कसरी तयार गर्ने र फिटनेसमा के कति ध्यान दिनुपर्ने रहेछजस्ता  विषयमा ज्ञान बढेको टमाटाको भनाइ छ । 

विश्वकप खेलिसकेका खेलाडीसँग खेल्न पाउँदा नेपाली खेलाडीले क्रिकेटसम्बन्धी धेरै कुरा सिक्न पाएको नेपाल क्रिकेट संघ कास्कीका अध्यक्ष सञ्जयकान्त सिग्देलले बताए ।

“एमसिसीमा इङ्ग्याण्डबाट विश्वकप खेलिसकेका खेलाडी थिए । हाम्रा खेलाडीले इङ्ग्याण्डका खेलाडीबाट अनुभव लिन पाए”, उनले भने, “अनुभवी खेलाडीसँग खेलेर जितेपछि हाम्रा चेलीहरूमा आत्मविश्वास बढेको छ ।” 

यो प्रतियोगिताले नेपाली खेलाडीको कमजोरी पनि देखाएको छ, जसलाई सुधार गरेर जाने अवसर मिलेको उनी बताउंछन् ।

पोखरामा माछापुछ्रे र अन्नपूर्ण हिमाल हेर्दै खेल्न पाउँदा निकै खुसी लागेको एमसिसी व्यवस्थापक क्लेरी टेलरको भनाइ छ । 

नेपाली टोली पनि राम्रो भएकाले खेल निकै प्रतिस्पर्धात्मक बनेको उनको प्रतिक्रिया थियो ।

क्रिकेटको जननी बेलायतको मेरीलिवोन क्रिकेट क्लबले दुई सय ३५ वर्षको इतिहास बोकेको छ । यो क्रिकेट क्लब सन् १७८७ मा स्थापना भएको हो । 

प्रतिक्रियाहरू

सम्बन्धित सामग्रीहरू