यूकेमा अस्पताल भर्ना हुने संक्रमित महामारी शुरु भएयताकै धेरै

फाइल तस्विर

लण्डन । बेलायतका अस्पतालहरुमा भर्ना हुने संक्रमितको संख्या कोरोना शुरु भएयाताकै सबैभन्दा उच्च पुगेको छ । गत अप्रिलमा कोरोना संक्रमण ‘पिक’ मा पुगेको बेला अस्पताल भर्ना भएका संक्रमितको संख्या १८ हजार ९२१ पुगेको थियो ।

विहीबार साँझसम्ममा बेलायतका अस्पताल भर्ना हुने संक्रमितको संख्या २१ हजार २८६ पुगेको ‘नेशनल हेल्थ सर्भिस’ (एनएचएस) ले जनाएको छ । 

पछिल्लो २४ घन्टामा मात्र दुई हजार १४३ जना कोरोना संक्रमित अस्पताल भर्ना भएका छन् । पछिल्लो समय एकै दिनमा अस्पताल भर्ना हुनेको संख्या यो नै सबैभन्दा बढी हो । हाल एक हजार पांच सयभन्दा बढी कोरोना संक्रमितको  भेन्टिलेटरमा उपचार भइरहेको छ ।

पछिल्लो २४ घन्टामा बेलायतमा ३९ हजार ३६ जना नयां संक्रमित थपिएको ‘डिपार्टमेन्ट एण्ड हेल्थ एण्ड सोसल केयर’ ले जनाएको छ । यो संख्या गत अप्रिल पछिकै सबैभन्दा उच्च हो ।

बेलायतमा कुल  संक्रमितको संख्या २१ लाख ८८ हजार ५८७ पुगेको छ । यसैगरी पछिल्लो २४ घन्टामा थप ५७४ संक्रमितको मृत्यु भएको छ । बुधबार कोरोना संक्रमणको दोस्रो लहर शुरु भएपछिकै सबैभन्दा बढी ७४४ संक्रमितको मृत्यु भएको थियो ।

यससंगै बेलायतमा कोरोना संक्रमणका कारण ज्यान गुमाउनेको जम्मा संख्या ६९ हजार ६२५ पुगेको छ ।