बीबीसी मास्टर सेफ: सेमिफाइनलको उपल्लो राउण्ड उक्लिए सन्तोष

लण्डन । ‘बीबीसी मास्टर सेफ प्रोफेसनल्स् यूके’ मा प्रतियोगी नेपाली सेफ सन्तोष साह सेमिफाइनल राउण्डमा पनि गतिलो प्रदर्शन गर्न सफल भएका छन्  ।  

मंगलबार राती ‘बीबीसी वान’ मा प्रसारित सेमिफाइनल राउण्डबाट अघि बढ्दै उनी अघिल्लो राउण्डका लागि छनोट भएका छन् ।  

प्रतियोगिताको सेमिफाइनल राउण्ड प्रवेश गर्न सफल १० प्रतियोगीलाई दुई समूहमा प्रतिस्पर्धा गराइएको थियो ।  

दुवै समूहबाट ४/ ४ जना छनोट गरेर कूल ८ जनालाई अघिल्लो राउण्डमा पुर्याइएको छ ।  

पहिलो राउण्डमा उत्कृष्ट प्रस्तुति गर्नेमध्ये तीन जना सिधै अर्को राउण्डमा लैजाने क्रममा सन्तोष पनि उत्कृष्ट ३ मै पर्न सफल भए । बाँकी ७ प्रतियोगीमध्ये अरु २ जनालाई पनि सिधै अघि बढाइयो भने अन्य ५ जनाबीच थप एक चरणको प्रतिस्पर्धा गराएर थप ३ जनालाई अघि बढाइयो र २ जना बाहिरिए ।  

सेमिफाइनल राउण्डमा अघि बढ्ने क्रममा सन्तोषले नेपालको हिमाली कुइजिनबाट प्रेरित रोस्टेड काँक्रोको बिंया, पोलेको कटहरको बियां, बन तरुल, प्याजको अचार, स्याउको चट्नी लगायतका परिकार प्रस्तुत गरेका थिए ।  

प्रतियोगिताको विगतका चरणमा उनले पोलेको भेडाको मासु, मासुको झोल, सिस्नु र आलुको तरकारी, बेथेको साग, भाङको चटनी, मकैको रोटी, तामाको अचार जस्ता मौलिक नेपाली खानाका परिकार पस्किएका थिए । अन्तरराष्ट्रिय स्तरमा प्रतिष्ठित बीबीसी मास्टर सेफ प्रतियोगितामा नेपाली खाना लिएर प्रतिस्पर्धा गर्ने सन्तोष नै पहिलो नेपाली सेफ हुन् ।

अब ८ जना सेमिफाइनलिस्ट प्रतियोगीबीच अर्को एक चरणको प्रतिस्पर्धा गराएर फाइनल राउण्डका लागि ६ जना छनोट गरिनेछ ।  जुन एपिसोड १० तारिख विहीबार प्रसारण हुनेछ । प्रतियोगिताको फाइनल १७ तारिख हुनेछ ।