बेलायती प्रधानमन्त्रीको चेतावनी: नयाँ वर्षमा फेरि लकडाउनको खतरा

बेलायती प्रधानमन्त्री बोरिस जोन्सन

लण्डन । बेलायती प्रधानमन्त्री बोरिस जोन्सनले लकडाउन हटाइएपछि पनि विशेष सतर्कता र सावधानी आवश्यक रहने बताएका छन् ।  

विहीबार सरकारको ‘कोरोना बिफिङ’ मा प्रधानमन्त्रीले लकडाउन खुलेलगत्तै कार्यान्वयन गरिने प्रतिवन्धहरु पालनाका लागि बेलायती जनतालाई अपील गरे ।  

कोरोना संक्रमण अझै पनि तीव्र दरमा फैलिरहेको अवस्थाप्रति सर्वसाधारणलाई सचेत गराउँदै उनले आवश्यक सतर्कता अपनाउन नसकिए फेरि अर्को लकडाउनको सामना गर्नुपर्ने खतरा औंल्याए ।  

‘यदि समयमै होशियार रहन सकेनौँ भने हामीले भाइरसमाथिको हाम्रो नियन्त्रण फेरि गुमाउने छौं । आजसम्म हामीले मेहनत गरेर हासिल गरेको उपलब्धि सबै खेर जानेछ । र नयाँ वर्षको बेला हामी फेरि अर्को देशव्यापी लकडाउनमा जान बाध्य हुनेछौं’, प्रधानमन्त्रीले चेतावनीको स्वरमा भनेका छन्   ।  

सरकारले गत सोमबार सार्वजनिक गरेको ‘कोभिड विन्टर प्लान’ ले तय गरेका प्रतिवन्धहरुको पालना नै तेस्रो लकडाउनबाट मुक्ति पाउने एक मात्र उपाय रहेको प्रधानमन्त्री जोन्सनको दावी छ ।  

संक्रमण घट्दै जाँदा प्रतिवन्धहरु खुकुलो पारिने जनाउँदै उनले धैर्य र लगानीको फल मिठो हुन्छ भने ।  

‘एउटा कुरा सम्झिनैपर्ने के छ भने अबको केही महिनामै हामीसँग कोभिड भ्याक्सिन उपलब्ध हुनेछ । म सांच्चिकै आशावादी छु’, उनले थपे, ‘अप्रिलसम्ममा अवस्था धेरै-धेरै राम्रो भइसक्नेछ ।’

यसअघि सरकारले इङ्ल्यान्डमा लागू लकडाउन आउंदो डिसेम्बर २ देखि खोल्ने र संक्रमणका आधारमा क्षेत्रीय रुपमा फरक-फरक तहका प्रतिवन्धहरु लगाउने घोषणा गरेको छ ।

यो पनि पढौं : इंग्ल्याण्डका कुन क्षेत्रमा कस्ता प्रतिवन्ध लागू हुँदै ?