तमु समाज यूकेको १९औं वार्षिक साधारण सभा सम्पन्न, काउन्सिलर गुरुङ दम्पत्ति सम्मानित

लन्डन । तमु समाज यूकेको १९औँ वार्षिक साधारण सभा गत १७ मे आइतबार लन्डन वेम्बलीको बारहाम पार्कभित्र अवस्थित समाजको सामुदायिक भवनमा सम्पन्न भएको छ।

बिहान ११ बजेदेखि सुरु भएको उक्त कार्यक्रम दुई चरणमा सञ्चालन गरिएको थियो। पहिलो चरणमा वार्षिक साधारण सभा र दोस्रो चरणमा हालै सम्पन्न बेलायतको स्थानीय निर्वाचनमा पुनः निर्वाचित काउन्सिलर कमल बहादुर गुरुङ दम्पत्तिलाई विशेष सम्मान गरिएको थियो ।

समाजका महासचिव शुब घलेले सञ्चालन गरेको कार्यक्रमको प्रारम्भमा ‘हेल्थ एन्ड सेफ्टी’ सम्बन्धी जानकारी प्रदान गरिएपछि समाजकी अध्यक्ष बिन्दु कुमारी गुरुङ घले, संस्थापक अध्यक्ष चित्र बहादुर गुरुङ, सल्लाहकार तथा काउन्सिलर कमल बहादुर गुरुङ, आमा समूहकी अध्यक्ष विमला गुरुङ तथा युवा समूहका अध्यक्ष प्रज्ज्वलमान गुरुङले संयुक्त रूपमा दीप प्रज्वलन गर्दै कार्यक्रमको विधिवत् उद्घाटन गरेका थिए ।

कार्यक्रममा समाजका वरिष्ठ उपाध्यक्ष भीम बहादुर गुरुङले स्वागत मन्तव्य दिए । त्यस्तै, निवर्तमान अध्यक्ष शिव कुमार गुरुङ, पूर्व अध्यक्षहरू शिवचन्द्र गुरुङ, अर्जुन गुरुङ, शिवशरण गुरुङ, संस्थापक अध्यक्ष चित्र बहादुर गुरुङ तथा सल्लाहकारहरूको तर्फबाट काउन्सिलर कमल बहादुर गुरुङले शुभकामना मन्तव्य राखेका थिए ।

वक्ताहरूले तमु समाज यूकेको स्थापना, उद्देश्य, परोपकारी कार्य तथा कला–संस्कृति संरक्षणमा संस्थाले खेलेको भूमिकाको चर्चा गर्दै संस्थालाई नेपाली समुदायको साझा पहिचानका रूपमा व्याख्या गरेका थिए । उनीहरूले विदेशी भूमिमा रहेर पनि भाषा, संस्कृति र सामुदायिक एकतालाई मजबुत बनाउँदै आएको संस्थाको योगदान प्रशंसनीय रहेको बताए ।

प्रगति प्रतिवेदन र विगतको समीक्षा

बन्दसत्रमा महासचिव शुब घलेले संस्थाको वार्षिक प्रगति प्रतिवेदन प्रस्तुत गर्दै वर्षभरि सम्पन्न भएका विभिन्न गतिविधिको समीक्षा गरे । उनले ल्होसार, बुद्ध पूर्णिमा, नेपालबाट आएका विशिष्ट व्यक्तित्वहरूको स्वागत–सम्मान, नेपाली महिला सेरेब्रल पाल्सी फुटबल टोलीलाई सम्मान तथा विभिन्न च्यारिटी कार्यक्रम गरिएको उल्लेख गरे ।

उनले यस्ता गतिविधिले बेलायतमा हुर्कँदै गरेको नयाँ पुस्तालाई आफ्नो भाषा, संस्कृति र संस्कारसँग जोड्न महत्त्वपूर्ण भूमिका खेलेको बताए । यी उपलब्धिहरू कुनै एक व्यक्तिको प्रयास नभई कार्यसमिति, आमा समूह, सल्लाहकार तथा सम्पूर्ण सदस्यहरूको सामूहिक मिहेनतको परिणाम रहेको उनले बताए ।

यसैगरी, आमा समूहकी अध्यक्ष विमला गुरुङले समूहको वार्षिक प्रगति विवरण प्रस्तुत गर्दै सदस्यहरूको सुख–दुःखमा समूहले पुर्‍याउँदै आएको सहयोग र संकलित दान रकमबारे जानकारी दिइन् । उनले गत मे ८ मा वेल्सस्थित स्कन्द भेल मन्दिरमा गरिएको आध्यात्मिक भ्रमण सफल भएको उल्लेख गर्दै यस्ता सद्भाव अभिवृद्धि गर्ने कार्यक्रमलाई निरन्तरता दिनुपर्नेमा जोड दिइन् ।

त्यसपछि कोषाध्यक्ष चन्द्रकान्त गुरुङ तथा निवर्तमान अध्यक्ष शिव कुमार गुरुङले संस्थाको वार्षिक आर्थिक आय–व्यय, चल–अचल सम्पत्ति र बैंक मौज्दातको विवरण प्रस्तुत गरेका थिए । बेलायतको मान्यताप्राप्त लेखापरीक्षक संस्था ‘जीएनएस एसोसिएट्स लिमिटेड’ का स्वतन्त्र लेखापरीक्षकद्वारा तयार पारिएको आर्थिक प्रतिवेदन सभाले सर्वसम्मत रूपमा अनुमोदन गरेको थियो।

भावी योजना र विधान संशोधनसम्बन्धी निर्णय

सभामा विभिन्न एजेन्डामाथि छलफल गर्दै महत्त्वपूर्ण निर्णयहरू पारित गरिएको छ। भावी कार्यक्रमअन्तर्गत समाजले निकट भविष्यमा ‘च्यारिटी डिनर नाइट’ आयोजना गर्ने तथा अन्य नियमित कार्यक्रमलाई वार्षिक कार्यतालिका अनुसार निरन्तरता दिने निर्णय गरेको छ।

त्यस्तै, आवश्यक परेमा विधान संशोधनका लागि वार्षिक साधारण सभा हुनुभन्दा तीन महिना अगावै ‘विधान संशोधन समिति’ गठन गरी समितिले तयार पारेको मस्यौदा साधारण सभामा प्रस्तुत गर्ने व्यवस्था मिलाउने निर्णय गरिएको छ । साथै, आजीवन सदस्यहरूलाई प्रदान गरिँदै आएको ब्याजको डिजाइन परिमार्जन गरी थप आकर्षक बनाउने तथा आगामी वार्षिकोत्सवको अवसरमा नयाँ ब्याज वितरण गर्ने निर्णय पनि गरिएको छ ।

साधारण सभाका सम्पूर्ण एजेन्डा पारित भएसँगै पहिलो चरणको कार्यक्रम समापन गरिएको थियो।

काउन्सिलर कमल गुरुङ दम्पतीलाई विशेष सम्मान

कार्यक्रमको दोस्रो चरणमा बेलायतको स्थानीय निर्वाचनअन्तर्गत ‘बरो अफ बार्नेट’ को बर्नटोक वडाबाट पुनः काउन्सिलर पदमा निर्वाचित समाजका सल्लाहकार कमल बहादुर गुरुङ र उनकी धर्मपत्नी तथा समाजकी सल्लाहकार एवं आमा समूहकी पूर्व अध्यक्ष माया गुरुङलाई विशेष सम्मान तथा बधाई ज्ञापन गरियो ।

समाजकी अध्यक्ष, संस्थापक अध्यक्ष तथा आमा समूहकी अध्यक्षले उनीहरूलाई मञ्चमा आमन्त्रण गर्दै खादा, फेटा र पुष्पगुच्छा प्रदान गरी सफल कार्यकालको शुभकामना दिए । उपस्थित सदस्यहरूले पनि खादा र पुष्पगुच्छामार्फत बधाई ज्ञापन गरेका थिए । लेबर पार्टीबाट निर्वाचित तथा पूर्व ब्रिटिस गोर्खा सैनिकसमेत रहेका गुरुङको स्थानीय राजनीतिक यात्रालाई नेपाली समुदायको गौरवका रूपमा लिँदै समाजले खुसी व्यक्त गरेको थियो।

सम्मान ग्रहणपछि मन्तव्य व्यक्त गर्दै काउन्सिलर गुरुङले आफू र आफ्नो परिवारलाई प्रदान गरिएको सम्मानप्रति कृतज्ञता प्रकट गरे । अघिल्लो निर्वाचनदेखि नै समाजबाट प्राप्त सहयोग स्मरण गर्दै उनले यसपटक पनि समाजका सदस्यहरूले देखाएको सद्भाव, स्नेह र समर्थनका लागि धन्यवाद व्यक्त गरे । उनले समाजबाट प्राप्त साथ, सम्मान र शुभेच्छाले आगामी कार्यकालमा जनमुखी सेवा गर्न थप प्रेरणा मिलेको उल्लेख गर्दै समुदायप्रतिको प्रतिबद्धता निरन्तर रहने विश्वास व्यक्त गरे ।

कार्यक्रम समापन गर्दै सभाध्यक्ष तथा समाजकी अध्यक्ष बिन्दु कुमारी गुरुङ घलेले काउन्सिलर गुरुङको आगामी कार्यकाल सफल, प्रभावकारी र जनमुखी रहोस् भन्ने शुभकामना व्यक्त गरिन् । साथै, उपस्थित सम्पूर्ण सदस्यलाई सक्रिय सहभागिताका लागि धन्यवाद ज्ञापन गर्दै कार्यक्रम विधिवत् रूपमा समापन भएको घोषणा गरिन् ।

बिहान ११ देखि सुरु भएको उक्त कार्यक्रम साँझ ७ः३० बजे सकिएको थियो । सो अवसरमा दरबार रेस्टुरेन्टले तयार स्वादिष्ट भोजन व्यवस्था गरेको थियो ।

-शिव कुमार गुरुङ