मतिना फाउण्डेशनले लन्डनमा मनायो ‘मदर्स डे’

लन्डन । नेवा कला संस्कृति जगेर्नामा समर्पित मतिना फाउण्डेशनले लन्डनमा एक कार्यक्रमबीच मदर्स डे मनाएको छ । संस्थाले विगत वर्ष जस्तै यसपटक पनि लन्डन अल्पर्टनस्थित क्ले ओभनमा कार्यक्रम गरेको हो ।

उक्त कार्यक्रममा करिब दश जना आमा र उनीहरुका परिवार सहभागी थिए । अन्जिला र अन्जिलिनाले सञ्चालन गरेको कार्यक्रममा फाउण्डेशन उपाध्यक्ष नगेन्द्र श्रेष्ठले स्वागत र शुभकामना मन्तव्य दिएका थिए । श्रेष्ठले जन्मदिने आमाको सम्मान र माया, सद्भाव प्रदर्शन गर्ने उद्देश्यले कार्यक्रम भएको जनाए ।

सो अवसरमा बालबालिकाले आ-आफ्नो आमाका सम्बन्धमा संक्षिप्त भनाइ राखेका थिए । करिब चार घण्टा चलेको उक्त कार्यक्रममा स्याम्पेन र केक काटेर खुशीयाली मनाइएको थियो ।