बेलायती विदेशमन्त्रीसंग कार्यवाहक राजदूत दुवाडीले गरे शिष्टाचार भेट

लन्डन । बेलायतका लागि नेपाली कार्यवाहक राजदूत विपिन दुवाडीले इण्डो प्यासिफिक मामिला हेर्ने बेलायती मन्त्री सीमा मल्होत्रासंग शिष्टाचार भेटघाट गरेका छन् ।

बुधबार बेलायती विदेश मन्त्रालय (एफसिडिओ) मा भएको उक्त भेट बेलायत नेपाल द्विपक्षीय मुद्दा र साझा हितहरूका विषयमा केन्द्रित रहेको लन्डनस्थित नेपाली दूतावासले जनाएको छ ।

करिब एक घण्टा लामो उक्त भेटघाटमा नेपालको पछिल्लो राजनीतिक परिवर्तन, व्यापार, लगानी, जलवायू, सामाजिक आर्थिक विकास आदि मुद्दामा सहयोग र प्राथमिकताबारे कुराकानी भएको कार्यवाहक राजदूत दुवाडीले नेपालीलिंकलाई बताए ।

सो भेटबाट नेपाल र बेलायतबीचको ऐतिहासिक एवं शताब्दीऔं लामो सम्बन्ध अझ सुदृढ बनाउने विश्वास दूतावासले गरेको छ ।