बेलायतका विद्यालयमा मोबाइल फोन प्रयोगमाथि तत्काल कडाइ गर्ने निर्णय

लन्डन, माघ ६, २०८२– बेलायत सरकारले विद्यालयहरूमा मोबाइल फोन प्रयोगमाथि तत्काल कडाइ गर्ने निर्णय गरेको छ । विद्यालय निरीक्षण निकाय अफ्स्टेडलाई अब प्रत्येक विद्यालय निरीक्षणका क्रममा मोबाइल फोन प्रतिबन्ध प्रभावकारी रूपमा लागू भएको छ कि छैन भन्ने अनिवार्य रूपमा जाँच गर्न निर्देशन दिइएको छ ।

विद्यालयहरूलाई ‘पूर्वनिर्धारित रूपमा फोन निषेध’ क्षेत्र बनाउने नीति लागू गरिने पनि बेलायत सरकारले जनाएको छ ।

बालबालिकाको सामाजिक सञ्जाल र मोबाइल फोन प्रयोगबारे बेलायत सरकारले राष्ट्रव्यापी परामर्श प्रक्रिया पनि सुरु गरेको छ । अत्यधिक स्क्रिन समयका कारण बालबालिकाको मानसिक स्वास्थ्य, शैक्षिक प्रदर्शन र सामाजिक विकासमा नकारात्मक असर परिरहेको भन्दै सरकारले डिजिटल प्रयोग नियमनतर्फ कडा कदम चालेको हो ।

यो कदमले बालबालिकाका लागि सुरक्षित र सन्तुलित डिजिटल वातावरण निर्माण गर्ने बेलायतको नीतिमा नयाँ चरणको सुरुआत भएको संकेत गरेको छ । अभिभावक, शिक्षक, विद्यालय प्रशासन तथा सांसदहरूबाट सामाजिक सञ्जाल र स्मार्टफोनको बढ्दो प्रभाव नियन्त्रण गर्न दबाब बढ्दै गएको थियो ।

सरकारका अनुसार यो परामर्शमार्फत अभिभावक, बालबालिका, शिक्षाविद् तथा नागरिक समाजका प्रतिनिधिबाट सुझाव संकलन गरिनेछ । यसले बालबालिकाले प्रविधिसँग स्वस्थ र जिम्मेवार सम्बन्ध विकास गर्न सक्ने उपायहरू पहिचान गर्न सहयोग पुर्‍याउनेछ ।

सरकारी तथ्यांकअनुसार विद्यमान नियमहरू हुँदाहुँदै पनि कक्षाकोठामा मोबाइल फोनको अवैध प्रयोग व्यापक रहेको देखिएको छ । माध्यमिक तहका ५८ प्रतिशत विद्यार्थीले केही कक्षामा अनुमति बिना मोबाइल प्रयोग हुने गरेको बताएका छन् । माथिल्लो कक्षाका विद्यार्थीहरूमा यो प्रतिशत ६५ सम्म पुगेको छ ।