एनपीएल फाइनलमा लुम्बिनी र सुदूरपश्चिम भिड्दै, कसले मार्ला बाजी?

काठमाडौँ । दोस्रो संस्करणको नेपाल प्रिमियर लिग (एनपीएल) को उपाधिका लागि आज (शनिबार) साविक उपविजेता सुदूरपश्चिम रोयल्स र लुम्बिनी लायन्स भिड्दै छन्।

कीर्तिपुरस्थित त्रिवि अन्तर्राष्ट्रिय क्रिकेट रंगशालामा दुई टोलीबीच आज दिउँसो साढे ३ बजे भिडन्त हुँदै छ।

साविक विजेता खेलबाट बाहिरिसकेकाले यस संस्करणमा नयाँ टोली च्याम्पियन बन्ने पक्का छ।

सुदूरपश्चिम र लुम्बिनी दुवै उपाधि हात पार्ने दाउमा छन्। लुम्बिनी नेपाली राष्ट्रिय क्रिकेट टिमका कप्तानसमेत रहेका रोहित पौडेलको नेतृत्वमा छ भने सुदूरपश्चिमको जिम्मा नेपाली राष्ट्रिय क्रिकेट टिमका उपकप्तान दीपेन्द्रसिंह ऐरीले लिएका छन्।

सुदूरपश्चिम लिग चरण खेल र साविक उपविजेता भएकाले लु्म्बिनीभन्दा बलियो देखिएको छ।

लिग चरणका सातमध्ये चार खेल जितेर पहिलो क्वालिफायर खेल्दै सुदूरपश्चिम उपाधिनजिक पुगेको हो।

सुदूरपश्चिम गत वर्ष फाइनलमा जनकपुर बोल्टससँग पाँच विकेट पराजित हुँदै उपविजेतामा सीमित भएको थियो।

लुम्बिनी यो वर्ष लिग चरणका सातमध्ये चार खेलमा विजयी हुँदै इलिमिनेटर र दोस्रो क्वालिफायर आफ्नो पक्षमा पार्दै फाइनलमा सुरक्षित भएको हो।

लुम्बिनी गत संस्करणमा लिग चरणबाटै आउट भएको थियो।

लिग चरणको उक्त खेलमा सुदूरपश्चिम सात विकेटले विजयी भएको थियो।

गत संस्करणमा एकपटक भेट भएकामा लायन्स ४५ रनले पराजित भएको थियो। तेस्रो भेट दुवैका लागि महत्त्वपूर्ण छ। जसले जित्यो, उसले च्याम्पियन बन्दै इतिहास रच्नेछ।

रोयल्सका कप्तान ऐरीले आफूहरू च्याम्पियन बन्न तयार रहेको बताएका छन्।

लायन्सका कप्तान पौडेलले पनि आफूहरू च्याम्पियन बन्नका लागि सबै पक्षबाट तयार रहेको बताएका छन्।

विजेताले कति पाउँछ पुरस्कार?

एनपीएलको पहिलो संस्करणको विजेता जनकपुर बोल्ट्सले एनपीएल ट्रफीसँगै करोडमाथिको पुरस्कार प्राप्त गरेको थियो। जनकपुरले च्याम्पियनसहित १ करोड १० लाख प्राप्त गर्दा उपविजेता सुदूरपश्चिमले ५१ लाख पाएको थियो।

यस पटक पनि नेपाल प्रिमियर लिग विजेता र उपविजेताले पाउने पुरस्कार पहिलो संस्करणकै जति छ। सुदूरपश्चिम र लुम्बिनी जो च्याम्पियन बने पनि १ करोड १० लाख पुरस्कार प्राप्त गर्नेछ भने उपविजेताले ५१ लाख हात पार्नेछ।

यस्तै पहिलो संस्करणमा तेस्रो भएको टिमले २५ लाख र चौथो भएकोले १५ लाख प्राप्त गरेको थियो।

यस पटक पनि तेस्रो भएको विराटनगर किंग्सले २५ लाख र चौथो भएको काठमान्डु गोर्खाजले १५ लाख पक्का गरेको छ।

व्यक्तिगत पुरस्कार- कारदेखि बाइकसम्म

एनपीएलमा विजेता टिम र उपविजेता टिमले पाउने पुरस्कार राशी ठूलो छ अनि व्यक्तिगततर्फ उत्कृष्ट बन्ने खेलाडीहरुका लागि पनि राम्रै पुरस्कार छ।

लिगभर उत्कृष्ट प्रदर्शन गर्दै उत्कृष्ट नेपाली खेलाडी बन्ने एक जनाले ओमोडा कार पुरस्कार प्राप्त गर्नेछन्। पहिलो संस्करण सुदूरपश्चिमका कप्तान दीपेन्द्र सिंह ऐरीले नेपाली खेलाडीमा उत्कृष्ट बन्दै कार पुरस्कार जितेका थिए।

यस पटक कार पुरस्कारका लागि सुदूरपश्चिमका कप्तान दीपेन्द्र सिंह ऐरीसँगै सोही टिमका ओपनर ब्याटर विनोद भण्डारी, बलर अविनाश बोहरा, लुम्बिनी लायन्सका कप्तान रोहित पौडेल, बलर शेर मल्ल अनि विराटनगर किंग्सका कप्तान सन्दीप लामिछाने होडमा छन्।

सुदूरपश्चिमलाई फाइनलसम्म पुर्‍याउने क्रममा दीपेन्द्रले गज्जबको कप्तानी गरिरहेका छन्। उनले आवश्यक पर्दा ब्याटिङ, बलिङ र फिल्डिङ सबै क्षेत्रमा योगदान दिएका छन्।

दीपेन्द्रले ८ खेलमा १५४ रन बनाउनुका साथै ८ विकेट लिएका छन्। उनले ८ खेलमै बलिङ समेत गरेका थिए। यस्तै फिल्डिङका राजा मानिने उनले १० क्याच गरेका छन्। यस्तै रनआउट उनै निकै चुस्त देखिएका छन् र डिरेक्ट हिट हानेपछिको मसरसल्ट सेलेब्रेसन पनि गज्जबको छ। उनी सर्वाधिक क्याच लिनेमा दोस्रोमा छन्।

यस्तै ब्याटिङमा विनोदले राम्रो सुरुवात दिलाएका छन् र सर्वाधिक रन बनाउनेमा दोस्रो स्थानमा पनि छन्। विनोदले लिग चरणमा पोखरा एभेन्जर्सविरुद्ध अविजित ६९ रन बनाएका थिए भने विराटनगरविरुद्ध ६३ रन बनाएका थिए।

बलिङतर्फ सुदूरको अट्याक मिडियम पेसर अविनाश बोहराले सम्हालिरहेका छन्। उनले १६ विकेट लिइसकेका छन्।

यस्तै लुम्बिनीका कप्तान रोहित पौडेल पनि आफ्नो टिमलाई फाइनल पुर्‍याउँदै सर्वाधिक रन बनाउनेमा शीर्ष पाँचमै छन्। रोहितले अर्धशतक बनाउन नसके पनि हरेक खेलमा टिमलाई योगदान गरिरहेका छन्। उनको उच्च स्कोर ४९ छ। रोहितले ४ खेलमा बलिङ समेत गर्दै ७ विकेट लिएका छन् यस्तै फिल्डिङमा ६ क्याच पनि लिएका छन्।

लुम्बिनीका बलर शेर मल्ल १४ विकेटसहित सर्वाधिक विकेट लिनेमा तेस्रो स्थानमा छन्। रुबेन ट्रम्पलम्यानसँगै नयाँ बल बलिङ गर्दै विपक्षीको विकेट लिन माहिर शेर मल्ल मिस्ट्री बलरको रुपमा चिनिन्छन्। यस पटक उनको बललाई रिड गर्न विपक्षी ब्याटरलाई समेत कठिन परिरहेको छ।

यस्तै विराटनगरलाई फाइनल पुर्‍याउन नसके पनि कप्तान सन्दीप लामिछानेले बलिङ अट्याकको नेतृत्व गर्दै सर्वाधिक विकेट लिने सूचीमा शीर्ष स्थानमा छन्। उनले ९ खेलबाट १७ विकेट लिएका छन्।

लिग चरणको प्रदर्शन हेर्दा सन्दीप अघि रहे पनि टिमलाई फाइनल पुर्‍याउन नसक्दा उनको दाबेदारी केही कम बन्न सक्छ।

लिगमा गरेको प्रदर्शन, टिमको जितमा गरेको योगदान, प्लेअर अफ दि म्याच अवार्ड लगायत विभिन्न पक्षमा उत्कृष्ट खेलाडीको पुरस्कार निर्धारण गरिनेछ।

बाइकको होडमा को अगाडि?

यस पटक नेपाल क्रिकेट संघ (क्यान) ले व्यक्तिगत उत्कृष्ट प्रदर्शन गर्ने तीन खेलाडीलाई मोटरबाइक प्रदान गर्नेछ। क्यानले गोल्छा ग्रुपसँग उत्कृष्ट खेलाडीलाई बाइक प्रदान गर्न सम्झौता गरेको थियो।

एनपीएल दोस्रो संस्करणको बेस्ट ब्याटर, बेस्ट बलर र बेस्ट राइजिङ प्लेअर एक-एक थान पल्सर मोटरबाइक प्राप्त गर्नेछन्। कारको होडमै रहेका खेलाडीहरु नै विधागत उत्कृष्टको होडमा पनि अगाडि छन्।

ब्याटिङमा लिग चरणमा विदेशी खेलाडीहरु हावी बनेका थिए। तर उनीहरु सम्मिलित टिम लिग चरणबाट बाहिरिएपछि अहिले नेपाली खेलाडीहरु पनि सर्वाधिक रन बनाउनेमा अगाडि आइरहेका छन्।

सर्वाधिक रन बनाउनेमा पोखरा एभेन्जर्सका इंग्लिस विकेटकिपर एडम रोसिङटन शीर्ष स्थानमा छन्। उनले ७ खेलमा १ शतक र २ अर्धशतकसहित सर्वाधिक ३२३ रन बनाएका छन्।

उनलाई पछ्याउनेमा विनोद भण्डारी र रोहित पौडेल छन्। विनोदले दुई अर्धशतकसहित २६४ रन बनाएका छन् भने रोहितले २६० रन बनाएका छन्।

यस्तै कर्णाली याक्समा मार्क वाटले एक शतकसहित २४६ रन बनाएर चौथो स्थानमा छ। लुम्बिनीका ओपनर डार्शी सर्ट एक अर्धशतसहित २४२ रन बनाएर पाँचौ स्थानमा छन्।

यसैगरी बेस्ट बलरतर्फ बाइकको होडमा सन्दीप लामिछाने अगाडि छन्। उनले ९ खेलमा १७ विकेट लिएका छन्। यस्तै सुदूरका अविनाशले १६ विकेट लिएका छन्। लुम्बिनीका शेर मल्ल १४ विकेटसहित तेस्रो स्थानमा छन्।

एलिमिनेटरबाट बाहिरिएको काठमान्डु गोर्खाजका कप्तान करण केसी र शाहब आलमले समान १३ विकेट लिएका थिए। सुदूरपश्चिमका हर्मित सिंह र लुम्बिनीका रुबेन ट्रम्पलम्यानले समान १२ विकेट लिएका छन्।

यस्तै इमर्जिङ प्लेअरले पनि यस पटक पल्सर बाइक पुरस्कार पाउनेछन्। फाइनलसम्म आइपुग्दा यो अवार्डका लागि लुम्बिनीका शेर मल्ल नै दाबेदारको रुपमा छन्। राष्ट्रिय टिममा परे पनि डेब्यु गर्न बाँकी उनले नेपालको यू-१९ र नेपाल ए टिमबाट पनि खेलिसकेका छन्।

यस्तै लुम्बिनीकै स्पीनरद्वय अभिशेष गौतम र तिलकराज भण्डारीले पनि राम्रो प्रदर्शन गरिरहेका छन्। अभिशेषले ९ खेलमा ७ र तिलकले ७ खेलमा ६ विकेट लिएका छन्।

पहिलो संस्करणमा कर्णालीका विपिन प्रसाद शर्माले ट्यालेन्ट हन्टबाट आएर उत्कृष्ट प्रदर्शन गर्दै इमर्जिङ प्लेअरको अवार्ड जितेका थिए। तर यस पटक उनको प्रदर्शन अपेक्षा अनुसार रहेन।

यस पटक विराटनगरका सुभाष भण्डारी, काठमान्ठुका सन्तोष यादव र आकाश त्रिपाठीजस्ता खेलाडीले पनि एनपीएलमा अवसर पाएका थिए। सुभाष भण्डारीले ३ खेल मात्र खेल्दा ५ विकेट लिएका थिए। यू१९ टिमबाट खेलिसकेका आकाशले ब्याटिङमा ८ खेलमा ११८ रन बनाएका थिए।