नेपाल स्कटल्याण्ड फ्रेण्डसीप फोरममा नयाँ नेतृत्व

लण्डन- काल गणना अनुसार ऋतु, समय फेरिने क्रममा अर्थात् पुरानो वर्ष पूरा भएर नयाँ वर्ष लाग्ने क्रममा त्यसलाई विशेष उत्साह एवं उमङ्गका साथ मनाइने विश्वव्यापी चलन छ । अहिलेसम्म विश्वमा कहिलेदेखि नयाँ वर्ष मनाउन थालियो भन्ने कुराको कुनै स्पष्ट तिथिमिति प्रमाण छैन, तैपनि पृथ्वीमा मानव विकाससँगै जहिलेदेखि समयको गणना गर्ने र त्यसलाई दिन, महिना, वर्षमा मानिने चलनको विकास भयो, त्यही समयदेखि नयाँ वर्ष मनाउने चलन चलेको हो भन्न सकिन्छ । 

नेपालमा पनि विभिन्न किसिमका नयाँ वर्ष मनाइन्छन् । कुनै समुदाय विशेष हुन्छन्, कुनै धर्म विशेष त कुनै राज्य सत्ताले आफ्नो दैनिकी कामकाजको लागि अङ्गीकार गरेका संबत् छन् । तीमध्ये विक्रम संवत् पनि एक हो जुन आम नेपाली जनसमुदाय र राज्यले पनि अङ्गीकार गरेको संबत् हो ।

२०औँ शताब्दीबाट जब नेपालीहरू अध्ययन, रोजगारी, आप्रवासीको रूपमा संसारका विभिन्न देशमा बस्न थाले तब त्यहाँ पनि उनीहरूले आफ्ना चाडपर्व, संस्कार र संस्कृति पनि साथै लिएर गए । 

यसै क्रममा नयाँ वर्ष विक्रम संवत २०८० साललाई बेलायतको एउटा राज्य स्कटलैण्डको डण्डी र टेसाइड क्षेत्रमा बसोवास गर्ने नेपालीहरूको सामुदायिक संस्था ‘नेपाल स्कटल्याण्ड फ्रेण्डसीप फोरम’ को आयोजनामा डन्डी शहरमा भव्य रूपमा  मनाइयो । 

लगभग ९० जना स्थानीय नेपाली सहभागी कार्यक्रम भारतीय आश्रमको सभाहलमा भएको हो । कार्यक्रममा सहभागीहरूले शुभकामना आदानप्रदान गरे । 

संस्थाकी सल्लाहकार तथा पूर्व अध्यक्ष डा. शिला त्रिपाठीले फोरमको इतिहास र गरेका कामबारे जानकारी दिएकी थिइन् भने निवर्तमान अध्यक्ष शोभा भट्टराईले आफ्नो कार्यकालमा भएका कामको जानकारी दिँदै सफलतापूर्वक कार्यकाल सम्पन्न गर्न सहयोग गर्ने सबैलाई धन्यवाद दिइन्  ।

कार्यक्रममा सहभागीहरुले नेपाली लोकप्रिय गीत संगीतमा नाच गान समेत गरेका थिए । राधा खत्री, महेश्वर खनाल र नवीन बर्देवाले गीत प्रस्तुत गरेका थिए भने वालकलाकारहरुले नृत्य एवं मनोरञ्जनात्मक प्रस्तुति गरे । 

प्रतिव्यक्ति प्रवेश शुल्क पाँच पाउण्डमात्र उठाइएको कार्यक्रममा गोर्खा तन्दुरीको मीठा नेपाली परिकारहरू सहभागीले स्वाद लिएर खाएका थिए । 

यसअघि फोरमका संस्थापक अध्यक्ष प्रा. डा. गोपाल सापकोटाको प्रमुख आतिथ्यमा सम्पन्न बैठकले संस्थाको ११ सदस्यीय नयाँ कार्यसमितिको निर्वाचन पनि सम्पन्न गरेको थियो ।  

नयाँ कार्यसमितिको अध्यक्षमा उद्धव भट्टराई, उपाध्यक्षमा मेनुका कटुवाल, सचिवमा देवी तिमिल्सिना, उपसचिवमा देवी वराल, कोषाध्यक्षमा रोशन भट्टराई साथै सदस्यहरूमा अनल गौतम, ज्योत्स्ना भट्टराई, राधा खत्री, जयन्ती खड्का, इला गुरुङ र नवीन वर्देवा चयन भएका छन् ।

यसका साथै भेलाले प्रा. डा. गोपाल सापकोटा, डा. शिला त्रिपाठी र शोभा भट्टराई रहेको तीन सदस्यीय सल्लाहकार समिति पनि गठन गरेको छ ।