शनिबार, माघ २६, २०८१
02:56 | ०८:४१

महामारीमै पनि बेलायतमा प्रपर्टीको भाउले बनायो नयाँ रेकर्ड

प्रपर्टी मूल्यमा डेढ दशकयताकै उच्च वृद्धि

नेपाली लिङ्क डिसेम्बर ३०, २०२१

लन्डन । महामारीकै बीच पनि बेलायतमा प्रपर्टी मूल्य लगातार बढेको बढ्यै छ ।

बिल्डिङ सोसाइटी ‘नेसनवाइड’ का अनुसार सन् २०२१ मा बेलायतमा घरको औसत मूल्य अहिलेसम्मकै उच्च रेकर्ड भएको छ ।  

नेसनवाइडको तथ्यांकले बेलायतमा वर्षको अन्तिम डिसेम्बर महिनामा घरको औसत मूल्य २ लाख ५४ हजार ८ सय २२ पाउन्ड पुगेको देखाएको छ। जुन मूल्य यही वर्षको शुरुवातको तुलनामा २३ हजार पाउन्ड बढी हो ।

सन् २०२१ मा बेलायतमा प्रपर्टीको मुल्यमा पछिल्लो डेढ दशकयताकै सबैभन्दा उच्च वृद्धि भएको तथ्यांकले देखाउँछ । सन् २००६ पछिका कुनै पनि वर्षमा यति उच्च दरमा प्रपर्टीको मुल्य बढेको थिएन । 

कोभिड महामारीका कारण देशको अर्थतन्त्रमा थुप्रै प्रतिकुल असरहरु परिरहंदा समेत प्रपर्टीको मूल्य लगातार बढिरहेको छ । तर नेसनवाइडले आउंदो वर्ष भने प्रपर्टीको भाउ केही सुस्ताउने आँकलन गरेको छ ।

यसअघि सरकारले ल्याएको ‘स्ट्याम्प ड्यूटी’ छुटको राहतका कारण पनि धेरैलाई घर किन्न प्रेरित गरेको ठानिएको छ । तर गत सेप्टेम्बर महिनादेखि नै उक्त राहत बन्द भएकाले त्यसको असर आगामी वर्षको बजारमा देखिने अनुमान छ ।  

त्यसो त अहिले आक्रामक रुपमा फैलिरहेको कोरोना भाइरसको ‘ओमिक्रोन भेरियन्ट’ ले पनि प्रपर्टी बजारमा नकारात्मक असर पार्ने ठानिएको छ ।

त्यस्तै, हालै बैंक अफ इंल्याण्डले ब्याजदर शून्य दशमलव १ बाट बढाएर शून्य दशमलव २५ पुर्‍याएको छ । नयाँ वर्षलगत्तै ब्याजदरमा फेरि हुने भनिएको वृद्धिले पनि प्रपर्टी बजारको गति थप मन्द पार्ने सम्भावना छ ।

प्रतिक्रियाहरू

सम्बन्धित सामग्रीहरू