शनिबार, असोज ३०, २०७८
07:47 | १२:३२

निर्मलको सफलताले परिवारमा थपिदिएको अर्को खुशी

कमलबहादुर पूर्जा फ्रेब्रवरी ४, २०२१

वीन्टर सिजन (जाडो याम) मा विश्वको दोस्रो अग्लो हिमाल ‘के–टु’ तर्फ प्रस्थान गरेको भाई निर्मल पूर्जाले प्रतिकुल मौसमका कारण समस्या पर्यो भन्ने खवर सुन्दा दुःखी भएको थिएं । जाडो समयमा सुनसान जस्तै हुने हिमालतर्फ लम्किएका भाईको सफलताका लागि भगवानसंग निरन्तर प्रार्थनासंगै ताजा जानकारी लिने क्रममा शनिबार पाकिस्तान र चीनको सिमानामा अवस्थित संसारकै दोस्रो अग्लो ८ हजार ६ सय ११ मिटर अग्लो ‘के–टु’ हिमालमा विन्टर सिजन (जाडोयाम) मा सफल आरोहण गरेको खवर पाएं । प्रतिकुल मौसमले भाईको यात्रा रोक्न सकेन ।

पर्वतारोहण क्षेत्रमा भाईले दोस्रो दुर्लभ कीर्तिमानी कायम गर्न सफल भएकोमा निकै खुशी छौं । निर्मलले सन् २०१९ मा ६ महिनाभित्रै विश्वका ८ हजारमाथिका सबै अग्ला १४ हिमालको सफल आरोहणको विश्व कीर्तिमान बनाएर अन्तरराष्ट्रिय स्तरमै ठूलो चर्चा कमाउंदा घरमा आमा हुनुहुन्थ्यो । अहिले आमा हुनुहुन्न । उहांको सम्झनामा भाईको खुशी मनाइरहेका छौं । अघिल्लो वर्ष आमा भाईलाई हेलिकप्टरमै लिन बेस क्याम्पसम्म पुग्नुभएको थियो । भाईको सफलताको खुशीयाली मनाउंदै गर्दा आमाको अकस्मात निधन भयो ।

अग्ला हिमालमा लगातार आरोहण गर्ने सक्ने शक्ति भाईलाई प्राप्त भएको देखेर हामी अचम्मित छौं । अघिल्लो वर्ष भाईले विश्वमै राखेको कीर्तिमानले हाम्रो परिवारसंगै नेपाल र जन्मभूमि म्याग्दीलाई समेत विश्वमा चिनाउन सफल भयो । मैले भाईको हरेक यात्रालाई सफल बनाउन भगवानसंग प्राथर्नासंगै आरोहण सफलताका लागि हरेक घण्टा भगवानसंग पुकार गर्ने गर्दथें । सात समुन्द्रपारी भएका हामीले जन्मभूमिका सबै हिमालको आरोहण गरेपछि चीन र पाकिस्तानमा पुगेको अवस्थामा तत्कालै सूचना प्राप्त गर्न समस्या भइरहेको थियो । भाईको हरेक गतिविधि कसैसंग प्रतिष्पर्धा नभई आफूसंग प्रतिष्पर्धा गर्ने दौडमा रहेका भाईले घमण्डलाई कहिल्यै पनि स्वीकार गरेन । उसको दिमागमा घमण्डले स्थान पाउनै सकेन ।

पर्वतारोहणमा भाईले विज्ञता प्राप्त मात्रै गरेको छैन् । विश्वका साना र ठूला हिमाल आरोहणका क्रममा धेरै आरोहीलाई मृत्युको मुखबाट समेत जोगाएको छ । सिकिस्त अवस्थामा रहेका आरोहीको जीवन रक्षामा भगवानले भाईलाई त्यो ठाउंमा पठाएको जस्तै महसुस भएको छ । मेरो बुबाआमा बिरामी हुंदा समेत भाईको सफलतालाई आफ्नो रोगभन्दा धेरै चिन्ता थियो । हिमाल आरोहण अब पनि हुनसक्छ तर पहिलोको जस्तो रफ्तार अब हुंदैन, अब हिमाल आरोहणमा जानेहरुलाई भाईले सुरक्षित यात्राको वातावरण बनाउने छ । भाईले आरोहणका लागि आफ्नो सम्पत्ति बेवास्ता गरयो, उसलाई करोडौंको पेन्सनले समेत आकर्षण गर्न सकेन् । उसको अभियानलाई सफल बनाउन हामीले व्यक्तिगत कामलाई समेत कम प्राथमिकता दिने अवस्था भयो ।

हाम्रो बुबाले भारतीय सेनामा मेजरको बढुवालाई समेत छोडेर परिवारलार्ई समय दिनुभयो । परिवारको आवश्यकताभन्दा पैसालाई बुबाले कहिल्यै पनि ठूलो सम्झिनुभएन । दानाबाट चितवनसम्म मेरो बुबाआमाले छोराछोरीको हितमै धेरै काम गर्ने योजना बनाउनुभयो जसलाई आज भाईले पुरा गर्दैछ । आफ्नो बुढेशकालमा गम्भीर रोगबाट ग्रसित हुंदा समेत ठूला भएका छोराछोरीको सफलतालाई जटिल रोगसंगै लडेर भएपनि साथ दिनुभयो । जेठो दाई गंगाबहादुरले गाउंमै शिक्षण पेसाबाटै ब्रिटिश आर्मीमा भर्ना हुनुभयो । दाईले ब्रिटिश आर्मीमा आफ्नो ब्याचमा खेलकुदमा औधि रुची राख्ने धावक समेत हुनुहुन्थ्यो । जेठो दाईले समेत खेलकुदमा हामीलाई प्रोत्साहन गर्नुहुन्थ्यो । गाउंमै शिक्षक पेशामा कार्यरत दाई जीतबहादुरले अवकासपछिको जीवनलाई सामाजिक क्षेत्रमा खर्चिनुभएको छ । सबै भाई गोर्खामा आर्कषित हुंदा जीतलाई शिक्षण पेशा नै मनपरयो ।

हाम्रो परिवारकी एकमात्रै बहिनी अनिताले नर्सिङमा बिएसम्मको अध्यययनसंगै नेपाल सरकारबाट विद्या पदकबाट सम्मानित समेत भइन् । अहिले अष्टेलियामा रहेकी बहिनी अनिताको सफलताले उत्साहित छु । मेरो परिवारमा बुबाआमाको सामाजिक तथा राजनीतिक यात्रामा सबै छोराछोरीले साथ दिएको अवस्था छ । बुबा नन्दबहादुर धेरै खुसी हुनुहुन्छ । स्वर्गीय आमा पूर्णकुमारी पूर्जाले ब्यक्तिगतभन्दा पनि समाजको फाइदाका लागि धेरै काम गर्नुभएको छ । मेरो आमाको तत्कालिन योगदान पञ्चायतकालामा महिला सभापति, म्याग्दी जिल्ला सदस्य सहित धेरै पदमा बसेर सेवा गर्नुभएको छ । आमाको इतिहासलाई जोगाउन भाई निर्मलले आफ्नै क्षेत्रमा भएको हिमालबाट आरोहण सुरुवात गरेको पनि अर्को महत्वपूर्ण पाटो हो ।

भाईको सफलतामा बुहारी सुची गुरुङ पूर्जाको ठूलो योगदान छ । बुहारीको साथ र सहयोगले ‘एक रथको दुई पाङ्ग्रा’ को परिचयलाई थप प्रष्ट पारेको छ । बुहारीले जोखिम अवस्थामा समेत दिएको उर्जाको उपलब्धि नै अहिलेको विश्व रेकर्ड कायम गर्ने वातावरण बनेकामा धेरै खुशी छु ।

भाईको सफलतामा परिवारको मात्रै हात छैन् । भाई निर्मलले विश्वभर अर्को खुशीको सन्देश प्रवाह गरेको छ भने हाम्रो परिवारमा अर्को खुशी थपिदिएको छ ।

(लेखक आरोहणमा विश्व कीर्तिमान राख्ने निर्मल पूर्जाका माइलो दाई हुन्)

प्रतिक्रियाहरू

सम्बन्धित सामग्रीहरू