लण्डनमा कोरोना नियम उल्लङ्घन गर्ने बेहुलीलाई १० हजार पाउण्ड जरिवाना  

लन्डन, १० कात्तिक– बेलायती प्रहरीले दक्षिण लण्डनमा एक नयाँ बेहुलीलाई विवाहमा कोभिड–१९ नियन्त्रण उपाय उल्लङ्घन गरेको आरोपमा करिब १० हजार पाउण्ड जरिवाना गरेको छ ।

प्रहरीले विवाहमा सहभागी करिब २५० पाहुनालाई नियम उल्लङ्घन गरी विवाहमा संलग्न भएको भन्दै घर फिर्ता गरिदिएको लण्डनबाट प्रकाशित इभ्निङ स्ट्याण्डर्ड दैनिक पत्रिकाले आइतबार उल्लेख गरेको छ ।

विवाहमा निम्ता दिएकी ती महिलालाई प्रहरीले पक्राउ गरी १० हजार पाउण्डसम्म जरिवाना तिर्नेगरी धरौटीमा रिहा गरेको छ ।

प्रहरीले आफूहरूलाई स्थानीय वासिन्दाले विवाहमा कोभिड–१९ नियन्त्रणका लागि तय गरेको नियम उल्लङ्घन गरेको भनी सूचना गरेपछि छापा मारेको थियो ।

विवाहमा दुलही र एक अन्य व्यक्तिलाई कोरोनाभाइरस नियन्त्रण कानून अनुसार जरिवाना हुनसक्ने बताइएको छ ।

पत्रिकाले जासुस प्रहरी सुपरिन्टेन्डेन्ट निक्की आरोस्मिथलाई उद्धृत गर्दै भनेको छ, “यो घटना कोभिड–१९ कानुनको जानाजानी उल्लङ्घन भएको र यसका कारण सङ्क्रमणको फैलिने सम्भावना थप हुने भएकोले उनलाई जरिवाना गर्न सिफारिस गरिएको छ ।”

विवाहमा २५० भन्दा बढी मानिस सहभागी भएका कारण यसले सामाजिक दूरीकायम नगरेको देखिएकाले जरिवानाका लागि सिफारिस गरिएको उनको भनाइ छ ।