![](https://www.nepalilink.com/wp-content/uploads/2024/02/horizontal.gif)
![](https://www.nepalilink.com/wp-content/uploads/2020/04/anugraha_810.gif)
लन्डन । नेपालका लागि बेलायती पूर्व राजदूत रिचर्ड मोरिसको असामयिक निधनमा बेलायतको नेपाली समुदाय पनि मर्माहत बनेको छ ।
बेलायती राजदूतको रुपमा उनको ४ वर्षे कार्यकालका क्रममा उनीसँग सहकार्य गर्नेहरुले उनलाई नेपाललाई माया गर्ने एक असल कूटनीतिज्ञका रुपमा सम्झिएका छन् ।
मोरिसले नोभेम्बर २०१५ देखि नोभेम्बर २०१९ सम्म नेपालमा बेलायती राजदूतको रुपमा जिम्मेवारी निर्वाह गरेका थिए ।
चार वर्ष नेपालको लागि बेलायती राजदूतको जिम्मेवारीमा रहँदा स्वर्गीय मोरिसले नेपाल र नेपालीहरुसंग घनिष्ठ सम्बन्ध बनाएका थिए । नेपाललाई औधि माया गर्ने उनले महाभूकम्पपछि बेलायती राजकुमार हयारीको नेपाल भ्रमण संयोजनमा प्रभावकारी भूमिका निर्वाह गरेका थिए ।
![](https://www.nepalilink.com/wp-content/uploads/2020/09/CDA53CB1-D7BE-4E49-9C5C-D78A48089D16.jpeg)
बिएनसिसी निवर्तमान अध्यक्ष राजन कंडेल
विशेष गरि ब्रिटेन नेपाल च्याम्बर अफ कमर्स (बिएनसिसी) प्रतिनिधिसंग निकट थिए मोरिस । नेपाल र बेलायतबीचको लगानी तथा व्यापार प्रवद्र्धनका लागि कैयौं प्रोजेक्टमा उनीसंग सहकार्य गरेका बिएनसिसीका निवर्तमान अध्यक्ष राजन कंडेलले मोरिसलाई नेपालका एक असल मित्रका रुपमा सम्झिन्छन् ।
‘अहिलेसम्म बेलायतबाट नेपाल गएका बेलायती राजदूतहरुमध्येकै उत्कृष्ट थिए रिचर्ड । नेपाललाई सांच्चिकै माया गर्ने एक असल मित्र पनि’, कँडेलले भने, ‘उनको निधन बेलायत र नेपाल दुवै देशका लागि ठूलो क्षति हो ।’
![](https://www.nepalilink.com/wp-content/uploads/2020/09/5414F972-EF4E-40E3-82F0-C298C1FB7F51.jpeg)
एनएनआरएनए यूके अध्यक्ष पुनम गुरुङ
उता एनएनआरएनए यूके अध्यक्ष पुनम गुरुङ पनि पूर्व राजदूत रिचर्डलाई नेपाललाई माया गर्ने असल कूटनीतिज्ञको रुपमा सम्झिन्छिन् ।
‘उहांले राजदूतको औपचारिक जिम्मेवारी मात्र निभाएर बस्नुभएन, नेपालीहरुप्रति सधैं स्नेह र प्रेम पनि दर्शाउनुभयो’, अध्यक्ष गुरुङले भनिन्, ‘उहाँको कार्यकालमा बेलायत र नेपालबीचको सम्बन्ध अझै घनिष्ठ बनाउने गरी काम गर्नुभयो ।’
ब्रिटेन नेपाल च्याम्बर अफ कमर्शका उपाध्यक्ष बिराज भट्ट पनि मोरिसको पछिल्लो खबरले मर्माहत छन् ।
‘उनी राजदूत भएर नेपाल जानु अघि लण्डनमै होस् वा नेपालमा हाम्रो टिम डेलिगेसनमा जाँदा होस्, मोरिससँगको साक्षात्कार र उनले दिएको ‘हस्पिटालिटी’ कदापी भुलिने छैन्’- बिराजले स्मरण गरे ।
मोरिसले भूकम्पपछि थलिएको नेपालको पर्यटन उकास्न देखि बेलायती लगानीकर्ता नेपाल आकर्षित गर्न सम्म उल्लेख्य पहल गरेको भट्टले बताए ।
एनआरएनए आइसीसी अनररी काउन्सिल सदस्य विनोद ज्ञवाली पनि मोरिसको निधनको खबरबाट आफू स्तब्ध बनेको बताउंछन् ।
‘उहाँसंगको हरेक भेटमा उहाँको नेपालप्रतिको चासो र सद्भाव छर्लङ देखिन्थ्यो’, ज्ञवाली भन्छन्, ‘बेलायती राजदूतको रुपमा उहाँले पुर्याएको योगदान हामी नेपालीहरुको मानसपटलबाट कहिल्यै हराउनेछैन ।’
![](https://www.nepalilink.com/wp-content/uploads/2020/09/8FEC9D89-B188-4411-A10B-738F1C41952E.jpeg)
बिराज भट्ट
ब्रिटिश सरकारले उनलाई फिजी गणतन्त्रका लागि जुलाइ महिनादेखि कार्यभार सम्हाल्ने गरि उच्चायुक्त तोकेको थियो ।
स्वर्गीय रिचर्ड मोरिसलाई बेलायती सञ्चारमाध्यमहरुले टप ब्रिटिश डिप्लोम्याट (बेलायती उच्च कूटनीतिज्ञ) भनेका छन् ।
सन् २०१५ मा नेपालको राजदूत नियुक्त हुनुअघि पनि उनले बेलायत सरकारका महत्वपुर्ण जिम्मेवारीहरु सम्हालिसकेका थिए ।
बेलायती विदेश मन्त्रालयको प्यासिफिक मामिला हेर्ने विभागको प्रमुखका रुपमा काम गरेका उनले अष्ट्रेलियामा कन्सुलर जनरलको भूमिका पनि निभाएका थिए ।
बेलायतको फार्नहमनजिक बेन्टली क्षेत्रमा बस्दै आएका ५२ वर्षीय पूर्व राजदूत मोरिस गत मे ६ तारिख बिहान १०.३० बजे दौड्न घरबाट निस्किएपछि बेपत्ता भएका थिए । उनको खोजीमा जुटेको ह्याम्पशायर प्रहरीले उनको शव सोमबार स्थानीय एलिस होल्ट जंगलमा फेला पारेको थियो ।
![](https://www.nepalilink.com/wp-content/uploads/2020/09/84C1BE07-1DB7-4605-9CCF-9D22BFFA3DBD.jpeg)
एनआरएनए आइसीसी अनररी काउन्सिल सदस्य विनोद ज्ञवाली