लन्डनमा गुल्मी जिल्ला समाजको अपांगता दिवस च्यारिटी, सहयोग नेपाल पठाइने

लन्डन- गुल्मी जिल्ला समाज यूकेले लन्डनमा एक विशेष कार्यक्रमसहित विश्व अपांगता दिवस च्यारिटी सम्पन्न गरेको छ ।

आइतबार लन्डन वेलिङको सेन्ट माइकल कम्युनिटी हलमा सम्पन्न च्यारिटी कार्यक्रमबाट संकलित रकम नेपालमा अपांगता भएका मानिसहरुको सहयोगमा हस्तान्तरण गरिनेछ ।

समाजका अध्यक्ष रुद्र थापाको अध्यक्षतामा सम्पन्न कार्यक्रममा प्रमुख अतिथि बेलायतका लागि नेपाली कार्यवाहक राजदूत विपिन दुवाडीले गुल्मी जिल्ला समाजले अपांगता दिवसको अवसरमा वर्षेनी गर्दै आएको च्यारिटी कार्यक्रमबाट आफू प्रभावित भएको बताए ।

बेलायतमा रहेका नेपालीहरुको मिलेर संकलन गरेको रकम नेपालमा आवश्यकतामा रहेका मानिसहरुलाई सहयोग गर्ने कार्य प्रशंसालायक रहेको उनले बताए ।

बेलायतको अग्रणी नेपाली संस्थाका रुपमा समाजले गुल्मी जिल्लामा गर्दै आएका परोपकारी कार्यहरुलाई निरन्तरता दिंदै भविष्यमा अन्य जिल्लाहरुमा समेत बिस्तार गर्न सकोस् भन्ने शुभेच्छा कार्यवाहक राजदूत दुवाडीले प्रकट गरे।

समाजका अध्यक्ष रुद्र थापाले अपांगता दिवस च्यारिटीमा संकलित रकमबाट भविष्यमा अक्षय कोष नै स्थापना गरी समाजका परोपकारी कार्यहरु व्यवस्थित तवरले सञ्चालन गर्ने योजना रहेको सुनाए । उनले कार्यक्रम सफल पार्न भूमिका निर्वाह गर्ने सबै अतिथि, सहयोगदाता, स्वयमसेवक तथा समाजको टीमलाई धन्यवाद दिए ।

संस्थापक अध्यक्ष ओमप्रसाद थापा काउछाले समाज स्थापना र अपांगता दिवस च्यारिटी सुरुआतको सन्दर्भ र पृष्ठभूमिबारे जानकारी गराए ।

कार्यक्रममा समाजका सल्लाहकारहरु विनोद ज्ञवाली र कोश्लेश्वर ढकाल, एनआरएनए यूके प्रवक्ता डा कुल कंडेल, एनआरएनए इंग्ल्यान्ड अध्यक्ष राममाया विष्ट, पशुपतिनाथ मन्दिर लन्डन अध्यक्ष रोमनाथ पाण्डेगायतले शुभकामना मन्तव्य दिंदै अपांगता दिवस च्यारिटीको निरन्तरता र बिस्तारका लागि सुझाव दिए ।

कार्यक्रमकी संयोजक एवम् समाजकी उपाध्यक्ष मञ्जु भण्डारीले स्वागत मन्तव्य राख्दै कार्यक्रमको रुपरेखाबारे बताएकी थिइन् ।

सो अवसरमा समाजलाई विभिन्न माध्यमबाट सहयोग गर्ने संस्थापक अध्यक्ष ओमप्रसाद थापा, सल्लाहकारहरु मोती भण्डारी, चक्रबहादुर राना, मीन दर्लामी, गोविन्द खरेल, समाजसेवी व्यवसायी संगीता मगर, पत्रकारद्धय शिव भण्डारी र ध्रुवराज अर्याललगायतलाई प्रशंसापत्रसहित सम्मान गरिएको थियो ।

कार्यक्रमको औपचारिक उद्घाटन प्रमुख अतिथि कार्यवाहक राजदूत विपिन दुवाडी, अध्यक्ष रुद्र थापा, संस्थापक अध्यक्ष ओमप्रसाद थापा र पूर्व अध्यक्षहरु अर्जुन गौतम, राम गलामी र टोप पल्लीलगायतले संयुक्त रुपमा दीप प्रज्ज्वलन गरी गरेका थिए भने पण्डित निलहरि घिमिरेले स्वस्तिवाचन गरेका थिए।

महासचिव महलाल घिमिरेले सञ्चालन गरेको कार्यक्रमको सहसंयोजन सचिव राधा खरेलले गरेकी थिइन् ।

कार्यक्रमको दोस्रो सत्रमा नेपालबाट आएका लोकदोहोरी गायक अर्जुन कुंवरले सांगीतिक प्रस्तुति गरी मनोरञ्जन दिलाएका थिए । दीपक मैथानेले सञ्चालन गरेको सो सत्रमा डिजे हेम विष्टले समेत नचाएका थिए ।

कार्यक्रममा समाजका सल्लाहकार ८६ वर्षीय पूर्व गोर्खा वीरबहादुर थापाले नेपाली र अंग्रेजी गीत गाएर सबैको मन जिते । अपांगता दिवसको सन्दर्भमा रेशम अर्याल र पन्थीले कविता वाचन गरे । सुआज्ञा केसी, जुना पुन, जेनिशा पुन, अलिशा पुन, अस्मिता मगर, विशाल तामाङ, युवराज डांगीलगायत स्थानीय कलाकारहरुले आकर्षक नृत्य देखाए ।

कार्यक्रमबाट संकलित कोषको विवरण चांडै सार्वजनिक गरिने समाजले जनाएको छ ।

तस्विर: प्रकाश कंडेल