लन्डनमा यही साता तेश्रो बिस्का जात्रा, यूकेमै बनाइए रथ र योसिंद्दो

लन्डन– पासा पुचः गुथि यूकेले यही साता १९ अप्रिल आइतबार डार्टफोर्ड ओपन एयर थिएटर सेन्ट्रल पार्कमा गर्न लागेको तेश्रो लन्डन बिस्का जात्राको तयारी अन्तिम चरणमा पुगेको आयोजकले जनाएका छन् ।

पासा पुचः गुथि यूकेले लन्डनस्थित नेपाली दूतावासको सहकार्य र स्थानीय संघसंस्थाको सहयोगमा गर्ने तयारी गरिरहेको बिस्का जात्राका लागि बेलायतमै रथ बनाउने कार्य सकिएको छ ।

तान्ने दुईवटा भैरव रथ र भद्रकाली रथ एवं उठाउने योसिंद्दो निर्माण भइसकेको पासा पुच गुथि यूके बिओटी अध्यक्ष सुशील प्रजापतिले जानकारी दिए ।

उनले मध्यपुरको प्रख्यात बिस्का जात्रा (सिन्दुर जात्रा) बालकुमारी खः, सिद्दीकाली खः, बिष्णुवीर खः र दक्षिण बाराही खः देखाउने योजना अनुरुप तयारी भइसकेको पनि बताए ।

जात्राको आकर्षण ठानिएका बाजाका लागि पासा पुचः गुथि यूकेका विभिन्न शाखाहरु तयारी अवस्थामा छन् । साउथ इष्ट लन्डन, लन्डन र अल्डरसट शाखाले धिमे बाजाको ४ टोलीको प्रवन्ध गरेका छन् भने धाः बाजाको २ टोली जात्रामा ल्याउन साउथ इष्ट लन्डन र रेडिङ शाखा जुटिरहेका छन् । त्यस्तै, बासुरी बाजाको ४ टोली रहनेछन् जसलाई साउथ इष्ट लन्डन लन्डन, अल्डरसट र रेडिङ शाखाले संयोजन गरिरहेका छन् ।

साउथ इष्ट लन्डन शाखाले नाय् खिं बाजा प्रस्तुत गर्ने तयारी गरेको छ । अरु बाजाहरु खिं, पोंगा, मिरध्ंगा लगायत पनि प्रस्तुत गरिने प्रजापतिले जनाए ।

जात्राका दिन हुने अन्य गतिविधि र आकर्षणमा समेबजि दों, खानाका परिकारहरु, आइसक्रिम भ्यान, पेय पदार्थ तथा व्यापारिक स्टलहरु, राफल ड्र (नेपाल जाने आउने हवाइ टिकट पुरस्कार) फेस पेन्टिंग पनि समावेश हुने आयोजकले जनाएका छन् ।

प्रजापतिका अनुसार, भैरव गण नाच, शेर शिंह नाच, गोर्खाली टाकटुके नाच र धिमे नाच जात्राका थप आकर्षण छन् ।

नेवा कला संस्कृतिलाई अन्तर्राष्ट्रियकरण गर्ने उद्देश्यसहित बिस्का जात्रा गरिएको आयोजकको भनाइ छ । भक्तपुरको प्रख्यात बिस्का जात्रालाई कपी नगरि लन्डन फ्यूजनमा परिणत गर्न आयोजक प्रयत्नरत छन् ।

अध्यक्ष प्रजापतिले नेपालबाट विभिन्न नगरपालिका मेयरहरु, सम्पदा र संस्कृतिविदहरु एवं लन्डनस्थित नेपाली दूतावास परिवार, बेलायती नेपाली डायष्पोरा लिडरहरु, युरोप र विश्वका अन्य देशबाट समेत अतिथीहरु बोलाइएको जनाए ।

इभेन्ट को–अर्डिनेटरका रुपमा पासा पुच गुथि यूके साउथ इष्ट लन्डनले संयोजन गरिरहेको छ । जात्रा मध्यान्ह १२ बजे शुरु भई सांझ ६ बजे समापन हुनेछ भने करिब २५०० दर्शक अपेक्षा गरिएको छ । जात्रा हेर्न अनलाइन लिए १० पाउण्ड र प्रवेशद्धारमा लिए १५ पाउण्ड टिकट शुल्क लाग्नेछ । १२ वर्ष मुनिका बालबालिकालाई भने निःशुल्क प्रवेश दिइनेछ ।

यस जात्रा सन् २०२२ मा लन्डनमा पहिलोपटक गरिएको थियो । दोश्रो २०२४ मा गरियो भने यसपटक तेश्रो संस्करण अझ परिष्कृत स्वरुपमा हुन लागेको हो ।