‘मेडिकल अपोइन्टमेन्ट’ का लागि शरणार्थीहरूलाई ट्याक्सी प्रयोगमा बेलायतको प्रतिबन्ध

लन्डन । बेलायत सरकारले शरणार्थीहरूलाई अस्पताल (मेडिकल अपोइन्टमेन्ट) जान ट्याक्सी प्रयोगमा रोक लगाउने भएको छ । यो नयाँ नियम आउँदो फेब्रुअरीदेखि कार्यान्वयनमा आउनेछ ।

बीबीसीको एक खोजले शरणार्थीहरूले टाढाको यात्रा गर्न पनि ट्याक्सी वा मिनी क्याब चढ्ने गरेको र गृह मन्त्रालयले एक पटकको २५० माइल यात्रामा ६ सय पाउण्डसम्म खर्च गरेको पत्ता लगाएपछि सरकारले यो निर्णय लिएको हो । सरकारले शरणार्थीहरूको यातायातमा वार्षिक लगभग १५.८ मिलियन पाउण्ड खर्च भइरहेको बताएको छ ।

कम्पनीहरूले नजिकको गन्तव्यका लागि पनि धेरै माइलेज देखाउन टाढाबाट चालकहरू बोलाएर पैसा कमाइरहेको आरोप ट्याक्सी चालकले लगाएका छन् । एकजना ट्याक्सी चालक स्टिभका अनुसार, उनलाई १.५ माइलको दूरीमा रहेको डेन्टल अपोइन्टमेन्टको लागि गेट्विक एयरपोर्टबाट रिडिङ (लगभग ११० माइल यात्रा) सम्म जान भनिएको थियो ।

गृहमन्त्री शबाना महमूदले अब यो व्यवस्था परिवर्तन हुने बताएकी छन् । उनले भनिन्, “शरणार्थीहरूले अस्पताल जान जथाभावी ट्याक्सी प्रयोग गर्ने कुरा अब बन्द हुन्छ । अबदेखि विशेष अवस्थामा मात्र ट्याक्सी प्रयोग गर्न दिइनेछ । अनावश्यक खर्च हटाउन म प्रतिबद्ध छु ।”

नयाँ नियम अनुसार, शरणार्थीहरूले ट्याक्सीको सट्टा सार्वजनिक यातायात प्रयोग गर्नुपर्नेछ । तर, शारीरिक रूपमा अशक्त, दीर्घरोगी र गर्भवती महिलाहरूलाई भने ट्याक्सी प्रयोग गर्न दिइनेछ । तर, उनीहरूले गृह मन्त्रालयबाट अनुमति लिनुपर्नेछ ।