बैंक अफ इंग्ल्यान्डद्वारा पुन: ब्याजदर वृद्धि, पुग्यो १४ वर्षकै उच्च

लन्डन ।बैंक अफ इंग्ल्यान्डले ‘बेसिक इन्ट्रेस्ट रेट’ (आधारभूत ब्याजदर) वृद्धिको घोषणा गरेको छ।  

विहीबार बिहान बैंकले यसअघिको ३ प्रतिशतलाई बढाएर ३ दशमलव ५ प्रतिशत पुर्‍याइएको जनाएको छ । यससंगै बेलायतमा आधारभूत ब्याजदर पछिल्लो १४ वर्षयताकै सबैभन्दा उच्च पुगेको छ। 

पछिल्लो एक वर्षको अवधिमा मात्रै बैंक अफ इंग्ल्यान्डले ब्याजदर बढाएको यो नवौँ अवसर हो। गत डिसेम्बर महिनामा शून्य दशमलव १ रहेको ब्याजदर एक वर्षभित्रै ३ दशमलव ५ प्रतिशत पुगेको छ।

बैंक अफ इंग्ल्यान्डले ब्याजदर वृद्धिको क्रम अझै जारी रहने चेतावनी दिएको छ। आगामी वर्षको मध्यतिर यो दर साढे ४ प्रतिशत पुग्ने आँकलन गरिएको छ जुन यसअघि अनुमान गरिएको भन्दा भने केही न्यून हो।

बैंकले वर्षको अन्तिम त्रैमासिक अवधिमा देशको अर्थतन्त्रमा शून्य दशमलव १ प्रतिशतको संकुचन आँकलन गरेको छ । जुन यसअघि अनुमान गरिएको शून्य दशमलव ३ प्रतिशतभन्दा धेरै न्यून हो।  

दैनिक उपभोग्य वस्तुको मूल्य वृद्धिले आक्रान्त बनेका बेलायतीहरुमाथि बैंकको आधारभूत ब्याजदर वृद्धिले थप मार पार्ने निश्चित छ।