बुधबार, साउन ९, २०८१
06:52 | ११:३७

यूकेको गोर्खा मिडियाद्वारा गायिका लामालाई पुरस्कार र तामाङलाई सहयोग वितरण

नेपाली लिङ्क नोभेम्बर २, २०२२

काठमाडौं । गोर्खा मिडियाको दोस्रो वार्षिकोत्सवको अवसरमा बेलायतमा घोषणा गरिएको पुरस्कार, सम्मान तथा सहयोग हस्तान्तरण गरिएको छ । 

काठमाडौंमा बुधबार आयोजित कार्यक्रममा गोर्खा मिडियाका सहसम्पादक ब्रिटिस गोर्खा वेलफेयर सोसाइटी (बीजीडब्लुएस) प्रवक्ता प्रकाश गुरुङले मिडियाका तर्फबाट तामाङ मौलिक गीत, संगीतमा उदयीमान गायिका अन्जु लामा थोकर पुरस्कार, भिडियो सम्पादक सागर तामाङ सम्मान र कलाकार दिनेशकुमार तामाङ सहयोग हस्तान्तरण गरेका हुन् । सिन्धुलीकी गायिका लामा, काभ्रेपलाञ्चोकका भिडियो सम्पादक तामाङ र नुवाकोटका कलाकार तामाङले जनही १० हजार नगद राशिको पुरस्कार तथा सम्मान पाएका हुन् । 

सिन्धुलीको दुर्गम गाउँ सुनकोसी गाउँपालिका-७ नागीमा २०५१ सालमा जन्मिएका गायिका लामा करिब एक दशकदेखि तामाङ तथा सेलो गायनमा सक्रिय छिन् । उनले ‘हिमालको चौंरी’, ‘मुनाल जोडी’, ‘जात्रा च्याला’, ‘आनीको छोरी’, ‘एला माया’ (तिम्रो माया), शैक्षिक चेतनामूलक गीत, आधुनिक, काँठ क्षेत्रमा प्रचलित लोक तथा दोहोरीलगायत दर्जनौं गीत गाइसकेकी छन् । उनी मोडलिङसमेत गर्छिन् । 

उक्त पुरस्कार गत सेप्टेम्बरमा गोर्खा मिडियाको दोस्रो वार्षिकोत्सवको अवसरमा बेलायतमा घोषणा गरिएको थियो । दुई कलाकार र दुई कर्मचारीलाई पुरस्कार र एक जनालाई सहयोग घोषणा भएकोमा कलाकारतर्फ तनहुँका लोकगायक कृष्ण थापामगरलाई पुरस्कार हस्तान्तरण गर्न बाँकी छ । कर्मचारीतर्फ गोर्खा मिडियाका सहसम्पादक प्रकाश गुरुङलाई भने २५ सेप्टेम्बरकै दिन प्रमुख अतिथि नेपाल पत्रकार महासंघ बेलायत शाखाका अध्यक्ष ध्रुवराज अर्याल र गोर्खा मिडियाका प्रबन्ध निर्देशक एवं फोटो पत्रकार मिलन तमुले हस्तान्तरण गरेका थिए । 

कार्यक्रममा संक्षिप्त मन्तव्य राख्दै सहसम्पादक गुरुङले पुरस्कृत गायिका अञ्जु लामाको कलाकारितामा निरन्तरता, सागर तामाङको थप उन्नति र दिनेशकुमार तामाङको स्वास्थ्यलाभसहित सांगीतिक बाटोमा अघि बढ्न शुभकामना दिए । उनले आफूहरु विदेशमा रहे पनि नेपाल र नेपालीको हितमा सधैं लागिरहने बताए ।  

पुरस्कृत गायिका लामाले आफूलाई योग्य ठानेर पुरस्कार प्रदान गरेको भन्दै गोर्खा मिडियाका प्रबन्ध निर्देशक मिलन तमु, सहसम्पादक प्रकाश गुरुङलगायत सम्पूर्ण टीमप्रति आभार भन्दै धन्यवाद दिइन् । उनले गोर्खा मिडियाको पुरस्कार र अन्य पुरस्कार तथा सम्मानका कारण आफू कलाकारितामा लागिरहन उत्प्रेरणा मिलरहेको बताइन् ।

प्रतिक्रियाहरू

सम्बन्धित सामग्रीहरू