आर्थिक स्थायित्व कायम गर्ने बेलायतका नयां प्रधानमन्त्रीको प्रतिबद्धता

लन्डन । बेलायतका नयाँ प्रधानमन्त्री ऋषि सुनाकले विगतका गल्ती सच्च्याउने र आर्थिक स्थायित्व पुनःस्थापना गर्ने प्रतिबद्धता व्यक्त गरेका छन् ।

राजा चाल्र्स तृतीयलाई मंगलबार बकिङघम राजप्रासादमा भेटेपछि उनीबाट सरकार गठनको आह्वान पश्चात् औपचारिक रूपमा प्रधानमन्त्री बनेका सुनाकले पहिलो सार्वजनिक मन्तव्यमा ट्रस सरकारबाट विगतमा भएका गल्ती सच्च्याउने तथा राष्ट्रको आर्थिक स्थायित्व पुनः स्थापना गर्ने प्रतिबद्धता व्यक्त गरेका हुन् ।

उनले त्यसनिम्ति गरिने निर्णयहरू कठिन हुने चेतावनी पनि दिएका छन् । “अहिले हाम्रो देशले गहिरो आर्थिक संकट सामना गरिरहेको छ,” प्रधानमन्त्री कार्यालय बाहिर पत्रकारहरूलाई उनले भने ।

प्रधानमन्त्री सुनाकले लिज ट्रसले आर्थिक वृद्धि सुधार गर्न चाहनु गलत नभएपनि त्यसमा गल्ती भएका बताएका छन् । आर्थिक वृद्धि बढाउन पूर्ववर्ती सरकारबाट भएका प्रयासले अमेरिकी डलरको तुलनामा आफ्नो देशको मुद्रा अवमूल्यन भएको बताउँदै उनले अघिल्लो सरकारका त्रुटी सच्च्याउन आफू प्रधानमन्त्री निर्वाचित भएको तर्क राखे ।

आर्थिक स्थायित्व नै आफ्नो सरकारको पहिलो प्राथमिकता भएको उनले दोहोरयाएका छन् ।