बेलायतमा कोरोना मृतक संख्या पुनरावलोकन

लन्डन । बेलायत सरकारले कोरोना भाइरस (कोभिड १९) को संक्रमणबाट मृत्यु हुनेको गणना संख्यालाई नयाँ मापदण्ड अनुसार  पुनरावलोकन गरेको छ ।

पछिल्लो तथ्यांक अनुसार बेलायतमा कोरोनाबाट मृत्यु हुनेको संख्या ५ हजार कम देखाइएको छ । योसँगै बेलायतमा यसअघि सार्वजनिक कोरोना संक्रमित मृतक संख्यामा १२ प्रतिशतले कमी आएको छ ।

इंग्ल्याण्डका स्वास्थ्य मन्त्री म्याट ह्यान्ककले कोरोना भाइरसबाट भएका मृत्युको बारेमा पुनर्विचार गर्न आग्रह गरेपछि मृतक संख्या पुनरावलोकन गरिएको हो  ।

स्कटल्याण्ड, वेल्स र नर्दर्न आएरल्याण्डमा कोरोना संक्रमण पोजिटिभ देखिएको चार हप्ताभित्रको मृत्युलाई मात्र समावेश गरिंदै आएको छ ।

तर बेलायतमा भने तेस्तो नभई मार्चमा कोरोनाबाट निको भैसकेको व्यक्ति जुलाईमा सवारी दुर्घटनामा मृत्यु भएपनि उसलाई कोरोना संक्रमणबाट मृत्यु भएको संख्यामा गणना गरिँदै आएको थियो ।

अब भने युकेका चारजना चीफ मेडिकल अफिसरहरुको निर्णय अनुसार कोरोना संक्रमण भएको २८ दिनभित्र भएको मृत्युको वाताविक तथ्यांकका आधारमा मृतक संख्या सार्वजनिक गरिनेछ ।

गत महिनादेखि बेलायतमा कोरोना संक्रमण र मृतक संख्यामा निकै कम हुँदै आइरहे पनि पछिल्लो समयमा कोरोना संक्रमित संख्या बढ्दै गएको छ ।

कोरोना संक्रमण नियन्त्रण गर्न विभिन्न स्थानमा लकडाउन समेत गरिएको छ । पहिलो चरणको कोरोना संक्रमणबाट पाठ सिकेको बेलायतले कोरोना संक्रमणको दोस्रो चरणको संक्रमण नियन्त्रणका लागि विभिन्न तयारी गर्दै आएको छ ।