बेलायतको ‘मिनी बजेट’ बारे नेपाली व्यवसायीसँग एकाउण्टेन्टहरुको अन्तरक्रिया

लन्डन । बेलायतमा कार्यरत नेपाली एकाउण्टेन्टहरूको संस्था ‘नेप्लिज एकाउण्टेन्ट्स एसोसियसन यूके’ ले बेलायत सरकारले यसै महिना सार्वजनिक गरेको ‘मिनी बजेट’ बारे बेलायतमा व्यापार व्यवसाय गरिरहेका नेपाली व्यवसायीहरूसंग जूममार्फत अन्तरक्रिया गरेको छ ।

ब्रिटिश अर्थमन्त्री ऋषि सुनकले सार्वजनिक गरेको मिनी बजेटका मुख्य बुंदाहरु र त्यसबाट कसरी लाभान्वित हुने भन्नेबारे छलफल केन्द्रित रहेको थियो ।  

कार्यक्रममा चार्टर्ड एकाउण्टेन्टद्वय युवराज न्यौपाने र गौरव बरालले कार्यपत्र प्रस्तुत गरेका थिए । 

छलफलमा जब रिटेन्शन स्किम, फर्लो, बाइ टु लेट प्रपर्टी आदि विषयमा वरिष्ठ एकाउण्टेन्ट्सहरु एलएन पाण्डे, हरिहर उपाध्याय, लेखनाथ घिमिरे, कृष्ण भट्टराई लगायतले दर्शक श्रोताका जिज्ञासाको जवाफ दिएका थिए ।

‘हामीले गत जुन महिनामा कोरोना भाइरस (कोभिड-१९) को संक्रमण रोक्न गरिएको लकडाउनबाट नेपाली व्यवसायीहरूलाई परेको असर र बेलायत सरकारले घोषणा गरेका राहत प्याकेजबारे नेपाली व्यवसायीहरुलाई जानकारी गराउन एउटा वेबिनार आयोजना गरेका थियौं।  उक्त वेबिनारबारे हामीलाई प्राप्त सकारात्मक प्रतिक्रिया र व्यवसायीहरुको आग्रह बमोजिम यो कार्यक्रम आयोजना गरेका  हौँ,’ नेप्लिज  एकाउण्टेन्ट्स एसोसियसन युकेका अध्यक्ष सरोज सापकोटाले भने ।

‘कोभिड १९ संक्रमण लगत्तै ब्रिटिश सरकारले यहांका व्यवसायीहरुको हितका लागि थुप्रै योजना सार्वजनिक गर्‍यो ।  तर बेलायतस्थित व्यवसायीहरुले ती कार्यक्रमबाट चाहे जति लाभ लिन सकेको देखिएन । त्यसैले संस्थागतरुपमा हामीले यस्तो पहल गरेका हौँ,’ नेप्लिज  एकाउण्टेन्ट्स एसोसियसन युकेका महासचिव शशिधर नेपालले भने ।

कार्यक्रमको संचालन वरिष्ठ एकाउण्टेन्ट शिव सैंजुले गरेका थिए भने वरिष्ठ एकाउण्टेन्ट तथा कर सम्बन्धी सल्लाहकार समिर प्याकुरेलले धन्यवाद ज्ञापन गरेका थिए ।

सो संस्थाले बेलायतमा रहेका नेपाली रेस्टुरेन्ट तथा क्याटरिंग व्यवसायीहरुका लागि एकाउन्ट तथा करसम्बन्धी जानकारी दिन आउँदो सेप्टेम्बर महिनामा अर्को वेबिनार संचालन गर्ने योजना बनाइरहेको पनि जनाएको छ ।