गोलुले कोरोनालाई जित्यो

गोलु हात्ती

कल्लु काग

चंखे खरायो

टिल्लु बाँदर

लम्बु जिराफ

डा. भोलु (भालु)

गोलु हात्ती कोरोना संक्रमित भएर अस्पतालमा भर्ना भएको खासखुस केहिदिन अघिमात्रै सुईंके स्याल र खसखसे दुम्सीले गरेका थिए। सोहि खासखुसलाई कल्लु कागले सिसौ बनभरि हल्ला फिंजाएछ । लौ ! अब सिसौ बनमा पनि त्यो संक्रमण फैलिने भो भनेर सबै बासिन्दाहरु डराएका छन् ।

अत: आज सिसौ बनको चौतारीमा सामाजिक दूरी कायम राख्दै सिसौ बनका बासिन्दाहरु, सिसौ बनलाई कोरोना प्रभावमुक्त कसरी बनाउने भनेर छलफल गर्न भेला भएका छन् ।

बैठकमा सबैले आ-आफ्नो धारणा र सुझावहरु राखे । सबैको कुरा सुनिसकेपछि नजिक उभिएका लम्बु जिराफ लामो घांटी तन्काउँदै शान्त स्वरमा सम्झाउँछन्- ‘कल्लु कागले हल्ला फिंजाउँदैमा उसको पछि लाग्ने?’ कुरा नबुझी नै हामी अनेक अड्कल बाजी नगरौं साथी हो । सबैलाई गोलुको स्वास्थ्य र अवस्थाबारे अवगत गराउंदै भन्छन्, ‘गोलुले कोरोनालाई जित्यो ।’ उनी थप अवगत गराउँछन्, ‘ची चीको गोलुसंग दैनिक फोनमा सम्पर्कमा भईरहेको छ । गोलु त अस्पतालदेखि भोलि डिस्चार्ज भएर घर आउंदैछ ।

गोलु अस्पतालदेखि डिस्चार्जदेखि भएर सिसौ बन फर्किने खबर सुनेर चंखे खरायो बुरुक्क उफ्रन्दै भन्छ- ‘गोलु अस्पतालदेखि सोझै सिसौ बन आउनु हुँदैन । गोलु बाहिर क्वारेन्टिनमा बस्नुपर्छ, सिसौ बनमा प्रवेश दिनुहुन्न ।’

घरि यता, घरि उता उफ्रन्दै गरिरहेको टिल्लु बाँदर आफ्नो शरीर कन्याउँदै भन्छ- ‘उता हाम्रो मामाघर सुन्दर बनमा पनि कोरोना संक्रमण निक्कै फैलिसकेछ । सोचौं है ! सोचौं !’ टिल्लु डर देखाउनु खोज्छ ।

लम्बु जिराफले टिल्लुको कुरा काट्दै भन्छ, गोलु हाम्रो छिमेकी र असल मित्र पनि हो । यस्तो परेको बेला नै असल छिमेकी र मित्रको पहिचान हुन्छ । कोरोना लाग्नु भनेको कुनै अपराध हैन । अस्पतालदेखि स्वास्थ्य भई डिस्चार्ज भएर आफ्नै घर, परिवारको रेखदेखमा बाहिरको सामाजिक संजालको दूरी राखेर बस्छ भने हामीलाई आपत्ति हुनुहुँदैन ।

उता, अस्पतालमा कोरोनालाई जितेर भोलि घर फर्किनु पाएको खुशीमा गोलु दंग छ । उनको उपचारमा खटेका  डा. भोलु (भालु) गोलुलाई बधाई दिंदै ‘तपाईंले कोरोनालाई जित्नु भयो । दवाईले नगरेको काम दुवा (प्राथना) ले गर्छ भनिन्छ । स्वास्थ्यकर्मीहरुको उपचारले मात्रै नभएर तपाईको आफ्नै आत्मबिश्वास अनि आफन्तहरुको शुभकामना र प्रेमको शक्तिले पनि तपाईलाई बचाएको छ ।’

‘हो कि, क्या हौ !’ आफ्नो मित्र ची ची ले फोनमा उनलाई दिएको हौसला सम्झिन्छ गोलु । आफन्त-परिवार र सिसौ बनका सबैलाई सम्झिएर गदगद हुँदै- ‘मैले कोरोनालाई जितें ।’

यतिबेला, गोलु शारीरिक र मानसिक दुवै तवरले आफूलाई पूर्णरुपमा स्वस्थ्य महसुस गर्दछ ।

समाप्त ।

मणि निवास
बालुवाटार, काठमाडौं
२४ मे, २०२०