ब्रिटेन्स् गट ट्यालेन्ट अडिसनमा नेपाल आर्मीका हरिचन्द्र

लन्डन । नेपाल आर्मीका लान्स कर्पोरल हरिचन्द्र गिरीले द ब्रिटेन्स् गट ट्यालेन्टमा अडिसन दिएका छन् । 

बेलायती टिभी च्यानल आइटिभीमा प्रसारण हुने चर्चित उक्त शोका लागि गिरीले शनिबार द किया ओभल, सरे काउन्टी क्रिकेट क्लव लन्डनमा अडिसन दिएका हुन् ।

नेपाली सेनाको शारीरिक तालिम तथा खेलकुद केन्द्रका लान्स कर्पोरल हरिचन्द्रले तीन मिनेटभित्र वैशाखीलाई ब्यालेन्समा राखेर आंखा नहेरि उल्टोबाट भर्‍याङको सिडी ओर्लने, चढ्ने कला देखाए । त्यसमा खुकुरी ‘प्याट्रन’ पनि समावेश थियो ।

गत वर्ष पनि उनले अडिसन दिएका थिए । यसपटक नतिजा राम्रो आउने आशामा छन् उनी । यसको परिणाम अक्टोबर १७ मा आउने गिरीले जनाए । 

अल्डरसटस्थित गोर्खा वाचका प्रशान्त थापाले केही आर्थिक सहयोग गरेपनि जान आउन, बस्न सम्पूर्ण खर्च आफैं बेहोर्नुपर्ने भएकाले कठिनाइ भएको उनी बताउंछन् ।

ब्रिटेन्स गट ट्यालेन्टको १९ औं संस्करणका लागि अडिसन शुरु भएको छ । प्रत्येक वर्ष कुनै पनि उमेरका प्रतियोगीहरूले आफूले प्रदर्शन गर्न चाहेको प्रतिभाका साथ टेलिभिजन प्रतियोगिताका लागि अडिसन दिन सक्छन् । औसतमा ब्रिटेन्स गट ट्यालेन्टको प्रत्येक श्रृंखलाले ६० लाख देखि १ करोडसम्म दर्शक आकर्षित गर्ने विश्वास गरिन्छ । 

उनले यही सेप्टेम्बर १० मा गिनिज वर्ल्ड रेकर्ड राख्ने उद्देश्यसहित फेरि अर्को प्रतिष्पर्धा पनि गर्दैछन् ।

दाङका स्थायी बासिन्दा ३१ वर्षीय गिरी १२ वर्ष अघि नेपाली सैनिकमा प्रवेश गरेका थिए ।

गिरीले पाँचौपटक विश्व कीर्तिमान बनाइसकेका छन् । उनले गुड्ने अवस्थामा रहेको टायरमाथि १ मिनेटमा १२० पटक स्किपिङ गरी ‘मोष्ट स्किप्स अन यान अपराइट टायर’ विद्याको गिनिज वर्ल्ड रेकर्ड राखेका छन् । 

उनले रेकर्ड राखेको उक्त विद्या गिनिज बुक अफ रेकर्डमै पहिलो विश्व विद्याका रुपमा समावेश भएको थियो । 

यसबाहेक उनले ४ वटा फरक–फरक विद्यामा पनि वर्ल्ड रेकर्ड कायम गरिसकेका छन् । उनले सन् २०२१ मा हातले टेकेर भर्‍याङको ५० खुड्किला १२.६५ सेकेन्डमा पूरा गर्दै पहिलो विश्व रेकर्डको सुरुवात गरेका थिए । 

त्यस्तै २०२२ मा उनले २ वटा रेकर्ड बनाए । खुट्टाको बीचमा फुटबल च्यापी हातले टेकेर सबैभन्दा छिटो २५.५८ सेकेन्डमा ५० मिटर हिंड्ने कीर्तिमान समेत उनकै नाममा छ ।

गिरीले आफ्नो खुट्टाको बीचमा फुटबल च्यापी हातले टेकेर सबैभन्दा छिटो १० मिटर हिँड्ने नयाँ कीर्तिमान बनाएका थिए जुन उनले ४.४९ सेकेन्डमा पूरा गरेका थिए । 

त्यसैगरी गिरीले सन् २०२३ मा २५.०३ सेकेन्डमा हातले टेकेर ७५ वटा खुड्किलाहरु झरेर चौंथो विश्व रेकर्ड कायम गरेका थिए ।

हातले टेकेर ५० खुड्किला १२.६५ सेकेन्डमा झरेको, खुट्टाको बीचमा फुटबल च्यापी हातले टेकेर २५.५८ सेकेन्डमा ५० मिटर पार गरेको, खुट्टाको बीचमा फुटबल च्यापी हातले टेकेर ४.४९ सेकेन्डमा १० मिटर पार गरेको अनि हातले टेकेर ७५ वटा खुड्किला २५.०३ सेकेन्डमा झरेको रेकर्ड पनि उनका छन् । 

उनले हिमालय रोडिज सिजन ४ मा समेत सहभागिता जनाएका थिए ।