बेलायतका पूर्व काउन्सिलर डा. कैनीको अध्यक्षतामा ‘नेपाली फर लेबर’ गठन

लन्डन– बेलायतमा डा बच्चु कैलाश कैनीको अध्यक्षतामा लेबर पार्टीको शुभेच्छुक संस्था  ‘नेपाली फर लेबर’ गठन भएको छ ।

नवगठित उक्त संस्थाको उपाध्यक्षमा विकास चुडाल, सचिवमा सोलिसिटर दिपक भट्टराई र कोषाध्यक्षमा अंकिता ढकाल चुनिएका छन् । यसै गरी सदस्यहरुमा जीत रानाभाट, पूण्य रेग्मी, लक्ष्मी गुरुङ, राजन खकुरेल, राम बगाले, कृष्ण भण्डारी, बिपिन निरौला र दिनेश घिमिरे छन्।

बेलायतमा कुनै एक राजनीतिक दल आवद्ध एक समुदाय वा कुनै देशका प्रवासी समुदायका मानिसहरु मिलेर आफ्नो राजनीतिक दल निकट शुभेच्छुक संस्था बनाउने प्रचलन छ।

बेलायतमा उल्लेख्य संख्यामा लेबर पार्टीका सदस्य र शुभेच्छुक रहको अनुमान गरिएको छ। बेलायतमा नेपालीमूलका १० भन्दा बढी व्यक्तित्व लेबर दलको सदस्य हुँदै स्थानीय निकायमा जनप्रतिनिधि समेत चुनिएका छन्।

यो संस्थामा बेलायतमा बसोबास गर्ने नेपाली जो बेलायतको लेबर पार्टीको सदस्य वा शुभेच्छुक छन्, उनीहरु जोडिन र आबद्ध हुन सक्नेछन्। संस्थाको उद्देश्य लेबर पार्टीमा सामेल हुन र सक्रिय रूपमा भाग लिन नेपालीहरूलाई प्रोत्साहित गर्ने, नेपाली समुदायमा लेबर पार्टीको लागि चुनावी समर्थन बढाउने, नेपाली समुदायको चासोका विषयहरू लेबर पार्टीभित्र प्रवर्धन गर्ने, स्थानीय, क्षेत्रीय र राष्ट्रिय चुनावमा नेपाली प्रतिनिधित्वलाई समर्थन र प्रवर्धन गर्ने एवं लेबर पार्टी भित्र नेपाल–बेलायत सुदृढ सम्बन्धको वकालत गर्ने रहेको अध्यक्ष डा. कैनीले बताए ।

बेलायतको सत्तारुढ लेबर पार्टीका सदस्य र शुभेच्छुकहरु यो संस्थामा आवद्ध हुन सक्ने डा कैनीले जानकारी दिए । छिट्टै बैठक बसेर कार्यसमिति विस्तार साथै विभिन्न विभाग पनि गठन गरिने कैनीले बताए।