शेष, बद्री कसैको झोला नबोकी एनआरएनएलाई एक ढिक्का बनाउन जुट्न दयानिधिले गरे अपिल

लन्डन– बेलायत लेस्टर निवासी एनआरएनए अभियन्ता एवं सफल व्यवसायी दयानिधि सापकोटा केही महिना मौन रहे ।

बेलायतबाट प्रतिनिधित्व गर्दै आइसीसी सदस्य र युरोप उपसंयोजकको जिम्मेवारी कुशलतापूर्वक पूरा गरिसकेका उनी एकाएक मौन बस्नुको मुख्य कारण थियो गैर आवासीय नेपाली संघभित्रको विभाजन ।

सन् २००६ बाट नै गैर आवासीय नेपाली संघ बेलायतमा सक्रिय भूमिकामा आएका सापकोटाले एक समय एनआरएनए यूकेको चुनाव आउंदा माहोल निकै तताउने गर्थे । अर्थात मिडल्याण्डका मतदाता उनकै वरिपरी घुम्थे । कसलाई जिताउने उनकै नेतृत्वले निर्णायक बनाउंथ्यो ।

जब डा. शेल घले र डा. बद्री केसी आ आफ्नै नेतृत्वलाई वैधानिकता प्रमाणित गर्न अदालत धाउन थाले, तब सापकोटा यस अभियानबाटै ‘ब्याक’ भए ।

लेष्टरमा तीन वटा रेष्टुरेन्ट चलाएर आफूलाई त्यही विजनेशमा इन्गेज गराइरहेका सापकोटा गत सोमबार मिडल्याण्ड नेपाली मेलामा भने कडा रुपमा प्रस्तुत भए । उनको भाषणमा जति आक्रोश थियो, संस्थाप्रति चिन्ता र माया पनि झल्कन्थ्यो ।

‘एनआरएनएलाई एकजुट नबनाएसम्म यो संस्थाको कुनै औचित्य छैन्’, उनले उद्घोष गरे, ‘न त मैले मेमा शेष घलेले गराएको अधिवेशनमा सदस्यता लिएं, न त अहिले बद्री केसीले गराएको अधिवेशनमा सदस्यता लिएं । मैले दुईटै समूहको सदस्यता लिएको छैन् । किनभने यो संस्थालाई एकजुट बनाउन हामीले पहल गर्नु पर्छ । विशेष गरि मिडल्याण्डका साथीहरुले पहल गर्नुपर्छ ।’

तालीको गडगडाहटबीच सापकोटाले अगाडि भने, ‘यहांका धेरै साथीहरु एक पक्षको चुनावमा जानु भएको थियो, म विस्तृतमा जान चाहन्न । तर अहिले एनआरएनए एकदम भीरमा छ, भीरमा खस्न लागेको गैर आवासीय नेपाली संघलाई हामी स्वच्छ मानिसहरुको आवाजले, हाम्रो कामले र क्षमताले यसलाई एकठाउंमा ल्याउनका लागि विश्वभर सन्देश दिंदै हामीले झकझक्याउन आवश्यक छ । हामी न त शेष घलेका झोले, न त बद्री केसीका झोले । हामी संघका इमान्दार कार्यकर्ता हौं । यो संस्थालाई हामीले एक बनाउन सक्नु पर्छ । त्यसैले सम्पूर्ण साथीहरुमा के भन्न चाहन्छु भने यो संस्था अब एक हुन्न भने आजैका दिनदेखि तपाईंहरु सबैले पदबाट राजिनामा दिनुस् । कसैको झोले नबन्नुस् । स्वच्छ एनआरएनए अभियन्ता बन्नुस् । अनि त्यसपछि हामी यसलाई ट्रयाकमा ल्याउन सक्छौं । नभए आज एउटाको झोला बोक्यो, भोलि अर्काको झोला बोक्यो । कसको कति दिन झोला बोक्ने ? संस्थालाई कहां पुर्‍याउने ? यो विषयमा हामीले छलफल गर्न आवश्यक छ ।’

अभियन्ता सापकोटाले एनआरएनएको अस्तित्व जोगाउन, सामुदायिक सद्भाव कायम गर्न, देशको समृद्धि र दोश्रो पुस्तालाई मातृभूमिसंग जोडिराख्न पनि संस्थामा एकता जरुरी भएको बताए ।

‘अहिले हामी एउटै ठाउंका छरछिमेकी, आफन्त, साथीभाई लडिरहेका छौं । आखिर त्यो के का लागि ?’ उनले भने, ‘ छोडौं सानातिना मनमुटाव, स्वार्थ र लोभ । अब हामी सबैले त्याग गर्ने बेला आएको छ ।’

केही स्वार्थ बोकेका ‘कथित’ अभियन्ताहरुकै कारण संस्था बर्बाद भएको उनको बुझाइ छ ।

‘संघको उद्देश्य गलत छैन, यहाँ त स्वार्थी जमात हावी भयो’- उनले भने- ‘अब सबै मतभेद त्यागेर संघलाई नयाँ जीवन दिउँ ।’  

दयानिधि शंकरदेव क्याम्पसबाट बीकम अध्ययन गर्दै गर्दा सन् १९९३ मा जर्मनी पुगे । करिब १५ वर्ष जर्मनीमा बिताएपछि उनी सन् २००६ अक्टोबर १ मा बेलायत आए ।

यता आएर बेलायतको लेस्टरमा तीनवटा इटालियन रेष्टुरेन्ट चलाइरहेका सापकोटालाई संघबाट फाइदा लिनु केही छैन् । बरु उनी आफैं दान दिन सधैं अगाडि सर्छन् ।

नेपालमा आपतविपत र प्राकृतिक विपत्ति हुँदा होस् वा शैक्षिक तथा स्वास्थ्य क्षेत्र, निरन्तर छ उनको आर्थिक सहयोग ।